Luciano Manara
El Luciano Manara (Milan, 23 marz 1825 - Roma, 30 giugn 1849) l'è staa on patriòta italian, trai figur pussee conossuu del Resorgiment. L'è mòrt duranta la difesa de la Segonda Repubblica Romana.
![](http://upload.wikimedia.org/wikipedia/commons/thumb/9/97/3630_-_Milano_-_Francesco_Barzaghi%2C_Monumento_a_Luciano_Manara_%281894%29_-_Foto_Giovanni_Dall%27orto_23-6-2007.jpg/200px-3630_-_Milano_-_Francesco_Barzaghi%2C_Monumento_a_Luciano_Manara_%281894%29_-_Foto_Giovanni_Dall%27orto_23-6-2007.jpg)
La vita Modifega
Amis del Carl Cattaneo, l'ha partecipaa ai Cinqu Giornad de Milan e in quella occasion l'ha anca comandaa i milanes che hann conquistaa Pòrta Tosa. Poeu , l'ha combattuu in de la Prima Guerra de Indipendenza cont on grupp de volontari che l'aveva organizzaa pròppi lù.
Quand però i Austriach hinn tornaa a Milan, el Manara l'è scappaa in Piemont: chì l'è staa miss al comand d'on grupp de bersagliee cont i quai l'ha combattuu in sul Pò e a La Cava (in Provincia de Pavia). Finida la guerra tra Austriach e Piemontes, l'è scenduu a Roma, indove la resisteva anmò la Repubblica Romana e indove l'è staa nominaa capp del Statt Maggior del Garibaldi. L'è mòrt menter el combatteva contra i soldaa frances in di sconter de Villa Spada.
I esequi Modifega
I funerai hinn staa celebraa a Roma in de la gesa de San Lorenz in Lucina. L'omelia l'è stada celebrada del patriòta e barnabita Ugo Bassi. El còrp per on poo l'è restaa a Roma, perchè la mader la gh'aveva minga el permess de part di Austriach de fàll portà a Milan. Per quella reson chì, el sò cadaver l'è staa portaa a Vescia (Lügan) con quell del Emilio Morosini e de l'Enrico Dandolo[1], e mettuu in de la medemma tomba. Quest l'è mudaa domà in del 1853, quand l'imperador Francesch Giusepp I l'ha consentii al trasferiment, anca se in d'ona manera streggiament privada. Domà dòpo l'Unità, in del 1864 el s'è poduu consentì ai Manara de fà su ona tomba de famiglia a Barzanò, indove gh'aveven ona villa.
A Milan, al Luciano Manara l'è dedicada ona via, vesin a Corso di Porta Vittoria e on monument ai Giardin Pubblich.
A Roma inveci hinn dedicaa al patriòta ona strada a Trastever, on licee e ona caserma.