William Cameron Townsend
El William Cameron Townsend (9 luj 1896 - 23 april 1982) a l'è staa on important missionari protestant in America Latina. El sò ministeri l'è comenzaa in di primm ann del XX secol. I organizzazion che l'ha faa sù duranta la soa vita (Traduttor de la Bibbia de Wycliffe; Istituu Estiv de Lenguistega) hinn attiv anca al dì d'incoeu, e hinn concetraa sul voltà la Bibbia in di lengov minoritari. L'idea che la moeuv quest organizzazion l'è che se la Bibbia l'è disponibil in del lenguagg de ona popolazion, questa la pò diventà pussee autònoma sul pian religios, e i sò appartenent pòden vess i capp de la pròpria gesa.
Quand, in del 1917-1918, el giovin Townsend el provava a vend di Bibbi in Spagnoeu in del Guatemala, el s'è renduu cunt che la magior part di persònn che l'incontrava la parlava nò el Castejan, ma el Cakchiquel, ona lengua che l'era mai stada scrivuda, traj alter còss. L'ha donca desmettuu de vend i sò Bibbi e l'ha comenzaa a viv traj Cakchiquel. Inoltra l'ha imparaa la lengua, de la qual l'ha creaa on alfabett e ona traduzion del Noeuv Testament in domà des ann.
Per i alter minoranz lenguistich, el Townsend l'ha fondaa in del 1934 in Arkansas el Camp Wycliffe (John Wycliffe l'è staa on eretich del Medioev, el primm a voltà la Bibbia in Ingles), faa sù per insegnà a giovin òmen aj vari metod de traduzion. Se a l'inizzi gh'eren domà cinch student, incoeu quest progett l'ha daa vita aj grand organizzazion che hinn staa citaa pussee sora.