Lumbard ucidental Quest articol chì l'è scrivuu in lombard, grafia milanesa.

L'Ambroeus Donegana (italian: Ambrogio Donegana; 1868-1929) l'è staa on dotor e poeta lombard.
L'è nassuu a Ogionn e l'ha studiaa medicina a Bologna in tra el 1889 e 'l 1891[1]. L'ha faa el dotor a Bosis, in Brianza.
Oltra a fà el dotor, l'ha scrivuu anca di poesii in lombard, soratutt in de la koinè milanesa ma anca in del dialett del sò paes, cont ona soa revisitazzion de la grafia milanesa.

La poesia Modifega

El Donegana l'è staa definii on poeta de vena facil, in del lecc d'ona tradizzion poetega consonta e che ormai l'aveva perduu on poo de originalità, anca se ghe vegna recognossuu che i sò vers i gh'hann on certo garb e ben faa.

On esempi Modifega

ME VORII GNAA...
Felissina, vuu sii beela,
come ol soo mè 'na madôna
vu sii n'ânger, sii na steela,
vu sii cara, vu sii bôna:
ma sa falla sta bontaa
quand che vu... me vorii gnaa?

Quand ve vedi a nâ in filânda
sû in la vita inscî strengiuda,
mî me senti in de la bânda
lî d'ol coeur 'mè 'na spongiuda:
ol mè coeur l'è innemoraa...
e vu s'ciao me vorii gnaa...

Da quel dî che v'hoo veduu
che vegnivov foèu de giesa,
Gervasoeu l'è staa piû luu:
bûj ol sangu, ol coo el me pesa,
batt ol coeur, me manca ol fiaa...
ma vu... s'ciao! Me vorii gnaa!

Ol majà el me pasà piû:
son scià magher 'mè on bacchett:
la passion che gh'hoo per vu
la me derva ol catalett:
car a vu, sont bell e naa
perchè vu... me vorii gnaa...
Inciodaa dent in la cassa,
quattaa sott al coverton
me vedrii portaa in sûll'assa
per voltamm in d'ol foppon
e dirii: l'è naa anca luu
perchè mî... l'hoo gnaa vorsuu...

Bibliografia Modifega

  • AA.VV., Antologia della poesia nelle lingue e nei dialetti lombardi dal Medioevo al XX secolo, Milan, Libri Schweiller, 2006.

Interprogèt Modifega

Referiment Modifega

  1. archiviostorico.unibo