Ferrovia Circumvesuviana
La ferrovia Circumvesuviana a l'è 'na red ferroviaria a scartament metrich italian de 950 mm a servizzi de la zona Est e Sud de l'area metropolitana de Napoli che la se estend per circa 142 km, partii in ses lign e 97 stazion.
 |
Quest articol chì l'è in la Vedrina de la Wikipedia |
|
| Ferrovia Circumvesuviana | |
|---|---|
| |
 Treno Metrostar a la Stazion de Napoli Garibaldi | |
| Tipolojia | Ferrovia suburbana |
| Stats | Itàlia |
| Territore | Provincia de Napoli |
| Vertura | 1890 |
| Part de | trasporti a Napoli |
| Linie | 6 |
| Operador | Ente Autonomo Volturno |
| Vegg operador | S.A. Ferrovia Napoli Ottaviano (1890-1901) Chemin de fer Naples-Nola-Baiano et extensions (1884-1937) SFSM (1901-1985) G.C.G. Ferrovia Circumvesuviana (1985-2001) Circumvesuviana srl (2001-2013) |
| Sit ofiçal | www.vesuviana.it |
| Scartament | scartament metrich italian |
| N. stazion e fermade | 97 |
| |
| istruzion | |
De proprietà de la Region Campania, l'è gestida de l'Ente Autonomo Volturno, che 'l oeuvra sia 'me gestor de l'infrastruttura che 'me che impresa ferroviaria.
Storia Modifega
I origin Modifega
In del 1884 a l'è verta, de la Chemin de fer Naples-Nola-Baiano et extensions 'na linia che la conligava Napoli, Nola e Baiano e in del 1890 a l'è verta la prima linia circumvesuviana, la linia in tra San Giuseppe Vesuviano e Napoli, longa 23 kilometer e a binari unich.
In del 1901 la Società Anonima Strade Ferrate Secondarie Meridionali la ciappa la gestion del servizzi e in pocch agn la slonga la linia principala per Sarno e la fa su 'na noeuva linia in su la costa per conligà Portici, Ercolano, Torre del Greco, Torre Annunziata e Pompei, per poeu taccàss a la veggia linia, a l'altezza de Poggiomarino, che la fa su donca l'anell ideal intorna al Vesuvi, cont on bacin de circa 300'000 personn e 3 milion de viaggiator l'ann.
In del 1905 a l'è attivada l'elettrificazion in la tratta Napoli-Pompei-Poggiomarino e in del 1913 a l'è attivada 'na stazion in comun cont la ferrovia Pugliano-Vesuvi.
I dopoguerra Modifega
Dopo de la fin de la prima guerra mondiala l'elettrificazion de la linia a l'è completada e in del 1926 i utent riven a 6 milion.
In tra el 1928 e 'l 1933 a l'è mittuu, in tucc i stazion, el sistema di Apparati Centrali Elettrici e la Dirigenza Unica, e la tension de la cadenaria a l'è volzada finna a 1200 Volt.
In tra el 1934 e 'l '37 a hinn mittuu di noeuv lign per 12 km e ona linia a l'è giontada in di lign SFSM.
Dòpo de l'eruzion del Vesuvi del 1944 la linia a l'è restada dannegiada. In del 1948 a hinn faa su noeuv 13,6 km de linia da Castellamare a Sorrento, cont on ligamm dirett de 47 km in tra Napoli e Sorrento.
Agn '70-'90 Modifega
.jpg)
Intorna ai agn '70 la red intrega a l'è modernizzada e tucc i marciapee di stazion a hinn rialzaa per permette de andàgh su a ras in sui treni noeuv. Semper in del midemm period la tension a l'è volzada a 1500 V e di stazion a hinn faa su de noeuv.
In del 1974 a l'è completada l'officina de Ponticelli, per la manutenzion de tutt el material rotabil. In del 1977 scomincen el lavorà per el binari dobbi in su la linia Poggioreale-Pomigliano d'Arco.
In del 1985 la red a l'è riscattada del Stat e mittuda sotta gestion governativa e la Region la finanzia el raddobbi Pomigliano d'Arco - Scisciano, vert dal 1997.
In di agn '90 a hinn crompaa di àlter treni, a hinn reddobbiaa di tratt e hinn staa faa sù di noeuv fermaa e stazion.
Agn 2000 Modifega
Pocch prima del 2000 i competenz in del trasport regional a hinn ceduu ai Region, dònca in del 2001 a hinn tolt via i commissari del governo e l'è fada su la società Circumvesuviana Srl, che in del 2003 la passa a l'Ente Autonomo Volturno. In del midemm period a hinn faa su alter 3 km de linia e l'è verta la Ferrovia Botteghelle-San Giorgio a Cremano, incoeu ciamada Linia 3 del Servizzi ferroviari metropolitan de Napoli.
A la fin del 2008 a hinn faa su di raddobbi in di lign e hinn mittuu in servizzi i noeuv ETR 200, e in del 2009 a hinn reddobbiaa di alter lign.
In del 2010 on treno el deralia intorna a Gianturco e 'l fa on mort e 'n poo de ferii.
El 27 de dicember 2012 la Circumvesuviana a l'è giontada a la gestion de l'Ente Autonomo Volturno dopo de 'n importanta crisi economega in di società controlaa de l'EAV che i ha faa squasi fallì e l'ha menaa a di disservizzi che gh'è anca incoeu.
Caratteristigh Modifega
La red intera a l'è armada a 950 mm e elettriticada a 1500 V in correnta continua.
'Na voeulta dismettuda la Dirigenza Unica, dal 2000 a l'è staa mittuu el sistema de Controllo Centralizzato del Traffico e ogni stazion a l'è stada donca adattada con i Apparati Centrali Elettrici a Itinerari.
El servizzi de la Circumvesuviana a l'è faa de l'Ente Autonomo Volturno cont contratt de la Region Campania in su 'sti tratt chì:
- ferrovia Napoli-Nola-Baiano
- ferrovia Napoli-Ottaviano-Sarno
- ferrovia Napoli-Pompei-Poggiomarino
- ferrovia Napoli-Botteghelle-San Giorgio a Cremano
- ferrovia Torre Annunziata-Sorrento
- ferrovia Pomigliano d'Arco-Acerra
La Circumvesuviana a l'è vuna di ultim red, tucc de proprietà EAV, a doperà i classificazion de treno acceleraa, dirett e direttissim.
Material rotabil Modifega
Al dì d'incoeu a hinn doperaa i Elettrotreni ETR 200 "Metrostar" e SFSM ETR 001-118. In principi, del 1904, eren doperaa di treni a vapor e in di agn '20 e '40 hinn miss in servizzi di noeuv elettrotreni, i SFSM faa su de la Solfer de Pozzuoli e de la Asgen de Genoa e faa su de trii cass bloccaa in su dò carrej, che hinn ordenaa ancamò in del 1990 con di mijorament.
In del 2008 entren in servizzi i Metrostar, faa su de la AndaldoBreda e de la Firema, pensaa per on servizzi pussee metropolitann e con ses port per convoeuj. In del 2019 entra in servizzi el primm revamping di vegg elettrotreni storegh di agn '20, pensaa per avè pussee de turism in su la linia.
Bibliografia Modifega
- Antonio Bertagnin, 100° della ferrovia Circumvesuviana, in Tutto Treno, n. 27, dicembre 1990, pp. 18–19.
- Eleuterio e Giorgio Vallini, Binari intorno al Vesuvio, in I treni, 20 (1999), n. 210, pp. 14-19.
- F. Bloisi, Circumvesuviana di un tempo, in Tutto Treno & Storia, n. 28, novembre 2012, pp. 14–25.
- Walter Guadagno, I treni dei pendolari, in I Treni Oggi, n. 13, ottobre 1981, pp. 26–31.
- Francesco Ogliari, Ulisse Paci, La Circumvesuviana. 100 anni di storia, 144 chilometri di tecnologia 1890-1990, Gabriele Mazzotta Editore, Milano, 1990, ISBN 88-202-0943-8
- Antonio Gamboni, La Ferrovia Napoli-Nola-Baiano, Circumvesuviana, Napoli, dicembre 2008.
- Antonio Bertagnin, Via libera alla Circumvesuviana, in Tutto Treno, n. 112, settembre 1998, pp. 18–19.