Chest artícol a l'è scricc in Lumbàrt, ortograféa orientàl unificàda.


La Stochèta (Stocchetta 'n italià) o Cà d'Ézen o Cà d'Ézem (denuminasiù oramài mìa piö 'n üzo) l'è 'na frasiù che fà part de du cümü, la part setentriunàla l'è sóta el cümü de Consés e la part meridiunàla l'è sóta el cümü de Brèsa. L'è colocàda dré a la stràda che de la cità la mìna en Val Trompia en corespondènsa de la biforcasiù co la stràda che mìna a Cobiàt. L'urìgin del topònim Stochèta (atestàt per la prima olta endèn docümènt de la segonda metà del sècol XVII) la par véser ligàda a 'na fàbrica de cortèi (ciamàcc "stòch"). I nòm "Cà d'Ézem"/"Cà d'Ézen" i par envéce ligàcc a la prezènsa söl pòst de 'na céza che apartignìa a la "domus" dei "Umiliati di Esine", prezènsa però che l'è mai stàda documentàda.

La céza parochiàla de la Stochèta l'è dedicàda a San Gioàn Batésta e l'è stàda fàda sö endèl sècol XVIII, ma 'na màpa de l'época de Napuliù la móstra zamò 'na céza söl stès sit, se pènsa che 'n edifìcio religiùs el gh'ìes zabèla 'ndel sècol XII. La cumunità de la Stochèta la g'ha cuminciàt a fà paròchia de per sò cönt endèl 1860 quan che parcc del teretóre che fàa de le paròchie de la Piéf de Consés e de San Faüstì de Brèsa i è stade destacàde per costetöéser la paròchia nöa[1].

Riferimèncc Modifega

  1. Valutazione del rischio archeologico - Località Stocchetta, Brescia 2012