Legnon
El Legnon o anca Pizz Legnon o domà la Pizza (in del dialett de Promana: [li'ɲoːŋ][1]; in del dialett de la val Tarten: [pets le'ɲuː][2]; in del dialett de Pont: [le'ɲoŋ][3]; in dialett de Delebi [la'pitsa]; in italian: Monte Legnone) l'è ona montagna di Alp Orobi alta 2.609 meter.
L'è la montagna pussee alta de la Provincia de Lecch e de la banda occidental di Orobi.
El gh'ha ona forma a piramid e 'l se troeuva in mezz tra el Lagh de Comm e la Valtellina, che inscì l'è separada anca de la Val Varron (voeuna di vall laterai de la Valsassina).
Anca se l'è minga ona montagna de quei pussee interessant per l'alpinismo, l'è frequentada assee per i escursion, anca perchè de lì in scima se ved on gran bell panorama: el se pò vedè tutt el Lagh de Comm, tutta la Valtellina e ona bella porzion di Alp fina al Mont Rosa.
Pussee a ovest la se troeuva ona scima pussee pinina (1711 meter) ciamada Legnoncin.
Compagn de tanti alter montagn del nord Italia, anca per el Legnon varen i duu proverbi (in contraddizion tra de lor):
|
«Quand el Legnon el gh'ha el cappell, lassa la ranza e ciappa el rastrell.»
|
e
|
|
«Quand el Legnon el gh'ha el cappell, o che fa brutt o che fa bell.»
|
Not Modifega
- ↑ Dizionario dialettale etnografico di Premana: de cént in-t-üne, la favola di una comunità, Comm, 2007
- ↑ dialettando.com
- ↑ paesidivaltellina.it