Peder

Quest articol chì l'è scrivuu in lombard, grafia milanesa.

Peder l'è on nomm de persona lombard maschil.

Variant

In del nord de la Lombardia (olta Brianza, Comasch, Valtolina) e in del Canton Tesin a gh'è anca la variant Pedro ['pe:dru].
In de la Bergamasca e in del Bressan a gh'è anca la version Piero, de origin venezziana (e, a la lontana, francesa).

In di olter lengov

• Cors: Petru
• Frances: Pierre (ant. Pierres, Piers)
• Gregh: Pétros
• Ingles: Peter, var. Pierce (ant. Piers)
• Italian: Pietro, var. Piero
• Ocitan: Pèire
• Romanc: Peider
• Romen: Petru
• Russ: Pëtr
• Spagnoeu: Pedro
• Todesch: Peter
• Venezzian: Piero

Variant alteraa

In lombard el nomm el pò vess alteraa, per esempi, in Pedrin, Pedroeu, Pedrolla.

Origin e spantegament

El riva del gregh Pétros, che l'è negott d'olter che la traduzzion letteral de l'aramaich Kepha, o Cephas, in Gregh Κηφας, (che 'l voeur dì "preja"). Quell chì a l'è 'l nomm che, a legg l' Evangel, el gh'è staa daa a l'apostol Simon proppi del Signor: Ti te se ciamareet Κηφας, perchè mi in su chella Κηφας chi a faroo su la mia Gesa. Parolla del Signor.
El Simon, deventaa poeu San Peder, l'è staa el primm papa: donca, la soa version latina, Petrus, la s'è spantegada in tutt la Cristianità.

Cognomm

• In area lombarda (e in general del Nord de l'Italia) el nomm Peder l'ha faa nass cognomm 'me Pedrett, Pedrin, Pedrolett, Pedrolin, Pedron e Pedrott.
• In ingles a gh'emm i cognomm vegg Pearce, Pearson e quei pussee moderni 'me Peterson.
• In spagnoeu a gh'emm Pérez.