Prodroga farmaceutega

Quell articol qì l'è scrivud in Lombard, cond l'ortografia Scriver Lombard.

Una prodroga, o profarmeg, l'è una droga farmaceutega o on oltra tipolojia de compost qimeg qe, despœs de hvir-l sonministrad, l'è bio-strasformad (çoè trasformad ind on olter compost qimeg dai enzima del organism) ind on compost qe el g'haa ona quai ativitaa farmacolojega. Inscambi de sonministrar diretament on prencepe ativ ind la so forma farmacolojegament ativa, el pœl vesser interessant doprar on profarmeg, presempe per miliorar la manera ind la qe la sostanza la ven asorbida, distribuida, biotrasformada o escretada (ADME). De spess, i profarmeg i è disegnads per aomentar la biodisponibilità del prencepe ativ, quand qe l'è asorbit poc dal trat gastro-intestinal. An'mo, on profarmeg el pœl vesser doprad per far senza qe el danegies celule o tessuds qe i è miga malads, de manera qe el sapes ativad domà quand qe el riva a levell del orgen malad; qesta stratejia de faits la se dopera de spess cond farmeg toseg fes, 'me presempe i qemioterapeg.

Esempe

La sonministrazion de prodroge l'è util fes quand qe se vœl rivar a distrets del organism qe se fa fadiga a rivar, 'me presempe el cervell, qe l'è protejid de la barrera ematoencefalega; la plœpart de le sostanze le ge riva miga a superar 'sta barrera, 'me ind el cas de la dopamina, qe la ven doprada come tratament per el Morb del Parkinson. La dopamina donca la ven sonministrada in forma de L-DOPA, sostanza qe la g'ha ona forma plussee vexina ai aminoacids, e donca la passa la barrera ematoencefaloga grazia ai trasportador dei aminoacids, e pò ind el cervell la ven trasformada in dopamina, qe l'è la sostanza ativa, grazie a dei enzima de bio-strasformazion qe i se ciama decarbossilasis dei L-amino acids aromateg.