Lumbard ucidental Quest articol chì l'è scrivuu in lombard, grafia milanesa.

San Siro (San Sir in lombard) l'è on quarteron de Milan, che 'l se troeuva a nord-ovest del centro (Municipi 7).
El confina con Lampugnan, QT8, con la zona Fera e con Trenn. A sud l'è limitaa idealment de via Novara e de via Rembrandt.
Fina al XIX secol San Sir a l'era on borgh arent a l'Olona, che 'l gh'eva el sò centro arent a piazzale Lotto: al dì d'incoeu el resta proppi on bell nagott de 'sto passaa, e l'uniga robba che le testimonia l'è la l'abside de San Sir a la Vepra (on riaa che 'l se butta in l'Olona), on gesioeu che l'è stada trada giò per fàggh sù ona villa.
L'è staa vun di borgh di Corp Sant fina al 1873. I abitant del paes gh'aveven el soranomm de bojoccatt, per via di camp de bojocch che le contornaven.[1]
Incoeu, a San Sir gh'è on bell poo de praa e lì visin di zonn cementizzaa del tutt: la pupart di cà l'è de la segonda metà del Noeuvcent.
A San Sir a gh'è 'l Stadio Giuseppe Meazza, che 'l serviss per i partid de folball (l'è lì che giughen el Milan e l'Inter) e per i cors di cavai. Minga lontan del quarteron la se troeuva anca quella che l'è ciamada Montagna de San Sir, fada sù cont i cattanaj di cà traa giò di bomb de l'ultima guerra.

Referiment Modifega

  1. Angelo e Gianni Bianchi, A ovest di Milano. Le cascine di Porta Vercellina, Milan, Associazione Amici Cascina Linterno, 2006.

Vos correlaa Modifega