Letteradura piemontesa

Quest articol chì l'è scrivuu in lombard, grafia milanesa.

Con letteradura piemontesa intendom el corpus de test scrivuu, in di secoi, in de la lengua piemontesa.

I origin

El primm testimoni de la formazzion del volgar piemontes a l'è staa trovaa in de la gesa de Santa Maria Magior a Vercei, e l'è on mosaich in sul paviment del 1040. El segond, inscambi, l'è on'iscrizzion in de la gesa de Sant Evas, a Casal, in Monfraa.
A bon cunt, el primm test on poo gross l'è quell di inscì-ciamaa "Sermon subalpin" del 1150, conservaa in de la Biblioteca Nazzional de Turin: hinn 22 sermon intregh, come coment a la liturgia, scrivuu 'me test didattegh per i scoeul che formaven i cavalier templar (al temp ghe n'era tanti in Piemont, che l'era in su la via Francigena). In del XII e XIII secol, in di cort de Saluzz, del Monfraa e de la Savoja i riva on mugg de trovador che, compagn de quell che 'l suced in Francia, porten i valor de l'amor cortes, in ocitan. L'unegh autor che 'l ne lassa quaicoss in piemontes a l'è 'l Nicolett de Turin.
In di secoi dopo, el piemontes el scomincia a afermass 'me lengua ministrativa in scambi del latin doperaa fina a quell moment. Oltra a la letteradura religiosa, donca, vegnen scrivuu in piemontes anca di document ofizziai, i att di nodar, cart comerciai, statutt e cronegh istoregh. El se desviluppa anca on teater piemontes, soratutt de argoment religios: i sò oeuver pussee famos a hinn "Ël Gelind" (a Lissandria) e "La Natività".

El period intermedi

Cont el spantegàss de la coltura umanista, anca el piemontes el gh'ha on sò autor ben important: Gioann Giorg Alion de Ast (1460-1529), che 'l scriv in piemontes la soa "Opera Iocunda", ona regolta de des fars ben divertent.
A partì del XVII secol, la letteradua piemontesa la se slarga anmò pussee, perchè l'è espression de 'na nazzion. L'è chì che 'l nass on gener poetegh che l'è domà piemontes, el "tòni". A la fin del Ses'cent, con la comedia "Ël Cont Piolèt" del Carlo Giambattista Tana, el nass el teater piemontes modern.

Bibliografia

• La letteratura in piemontese. Dalle origini al risorgimento di Giuseppe Pacotto