Montagna de San Sir
|
«'Me te seet bella in controlus, stasera:
te vardi e te me paret vera! Te seet costada lagrim e sospir, tomba di noster cà, montagna de San Sir!» |
(Nino Rossi, Montagna de San Sir, 1976)
|
La Montagna de San Sir (Monte Stella o Montagnetta di San Siro in Italian) a l'è ona collina artifical che la se troeuva a Milan, in del quarter QT8 (periferia nord-ovest). L'è anca vun di giardin de la città.
Storia e descrizion Modifega
L'è ona collina che l'è stada fada sù cont i maceri di cà traa giò di bomb di Leaa duranta la Segonda Guerra Mondial e con quèi de tòcch di Bastion, traa giò dòpo de la guèrra. El progètt a l'è de l'architètt Piero Bottoni, che le gh'ha dedicaa a la soa miee Stella.
L'è alta quarantacinch meter, anca se in del progètt originari la gh'aveva de vèss alta el doppi; oltra ai vari maceri e rovinn, gh'è staa giontaa de la tèrra e del cement, e poeu gh'hann faa crèss sora l'erba e i piant.
Al dì d'incoeu el giardin el gh'ha ona superfis de 370.000 meter quadraa, con bosch e di gradoni che fann andà sù la gent fina in scima al montesèll, indove che se pò vedè tutt Milan e 'l sò circondari. Poeu, se 'l temp a l'è bèll, se poden anca vedè i Alp e i Penin.
El mont e la soa origin hinn descritt in la canzon del Nino Rossi Montagna de San Sir, del 1976 (album La bèlla Milan).
In del 2007 a la Bicocca gh'è stada fada ona noeuva montagnètta, ciamada Collina dei Ciliegi (collina di scires).
La flora Modifega
Foeura che on boschett selvadigh, la Montagna de San Sir la gh'ha di piant compagn a quei di alter parch de Milan, con rosc de alber insemma a praa e arei de sosta. Tra i alber che gh'è, a regordom: el zerb (de tanti speci), l'olma, la rogora, el foo, la beola, el tej, el platen, el zeder, la pescia, el pin, la robinia, el carpen, la pobbia e l'ailant.
El Giardin di Giust Modifega
A partì del 2003 gh'è staa faa lì arent anca on giardin che 'l voeur regordà quei giust (termen ciappaa del Talmud) che s'hinn oppost a di genocidi o a crimen contra l'umanità: gh'è di alber in onor de Moishe Bejski, Andrej Sacharov, Svetlana Broz, Pietro Kuciukian e alter anmò. La scerna de on noeuv giust a l'è fada ogni ann de on comitaa che 'l catta dent on grupp de personn important in tucc i camp de la società.
Bibliografia Modifega
- Liliana Casieri; Lina Lepera; Anna Sanchioni, Itinerari nel verde a Milano, supervisione botanica: Pia Meda; supervision farmacognostica: Massimo Rossi; Illustrazion e impaginazion: Linke Bossi, Consonni, Montobbio, Comun de Milan, settor ecologia, GAV.
- AA. VV., Enciclopedia di Milano, Milan, Franco Maria Ricci Editore, 1997.
- AA. VV. La magia delle piante, 1987, Segraa, Milan, Roland ed Elfie E. Wolf editore.