Storia de Noara
La Storia de Noara la partiss del temp di Roman fina a rivà al dì d'incoeu.
Tendenzialment, poeudom spartilla in d'on quai moment important:
- El period di roman
- El period olt medieval e comunal
- El period de la dominazzion milanesa
- El period de la dominazzion piemontesa
- El period del dì d'incoeu
I origin Modifega
Segond 'na quai interpretazzion, la città la saria stada fondada di Liguritt in di secoi che gh'è prima del rivà di Celta. La zona, alora, la se saria ciamada Aria. Di studi pussee recent hann marcaa el fatt che 'l Noares l'eva abitaa, prima di roman, de on rosc de Celta che viveva in tra el Tesin e la Sesia: i Vertamocher.
La pianta de la città, a bon cunt, la fa pensà ai sò origin romann. De fatti l'è fada su intorna a dò strad principai: el Card (cioè i cors Cavour e Mazzini de incoeu) e 'l Decuman (cioè i cors Cavallotti e Italia de incoeu). El nomm latin de la città, Novaria, l'è staa interpretaa 'me "ara noeuva", e 'l va mandaa indree a la fondazzion noeuva de la città, che l'è stada in intorna al 89 prima de Crist. La colonia fondada di Roman, a bon cunt, l'ha minga vist a rivà di colon latin, ma quei vegg del territori, che hann cettaa de spostass in del center urban noeuv.