Bira Wührer
|
|
Chest artícol a l'è scricc in Lumbàrt, ortograféa orientàl unificàda. |
La Wührer l'è stàda 'na fàbrica de bira italiàna atìva 'nfìna al 1988. L'è stàda la prìma fàbrica de bira 'n Italia, fondàda endèl 1829 a Brèsa del imprendidùr de urìgin austrìaca Franz Xaver Wührer.
Stória
Modifega
La prìma séde de la birerìa Wührer l'ìa 'n Contrada de Santa Maria 'n Calchera (encö via Trièste), endèl cör de Brèsa, 'ndóche amò 'ncö gh'è 'na tàrga che la regórda la sò prezènsa. Endèl 1889 giü dei fiöi del Franz Xavier, Pietro, el g'ha crumpàt en teré a la Burnàda, 'na zòna a la periferìa orientàla de Brèsa, e 'l g'ha fat fà sö 'n stabilimènt co le tecnologìe piö modèrne per chèla época là. El vegnarà finìt endèl 1895 ma la prudusiù la stantàa a pàrter per vìa de la situasiù econòmica e de le pulìtiche fiscài del tép. Endèl 1898 el stabilimènt l'è stat ciapàt en gestiù del fiöl de Pietro, Pietro Junior Wührer, che 'l gh'ìa apéna finìt i stüde de chìmica a Türì e de perfesiunamènt en Baviéra. La prudusiù la vegnarà isé rilanciàda e la bìra Wührer la deentarà 'na màrca cunusìda 'n töta Italia e pò a föra.
Endèl 1935 la società Wührer la crumpa la Società Toscana Paszkowski de Firènse che l'ìa titolàr de la Birra Roma, fàbrica 'n atività 'ndèla capitàl, isé la Wührer la s'è troàda con tré sédi de prudusiù: Brèsa, Firènse e Roma.
Endèl segont dopoguèra la società bresàna la farà amò 'na quach ótra aquizisiù de società del setùr.
Endèl 1981 la multinasiunàla alla BSN (Danone) la crumparà 'n pachèt de asiù de la Birra Wührer S.p.A. e 'ndèi agn dòpo 'n pó a la ólta la ciaparà 'l contròl de la società bresàna.
Endèl 1988 la società la vé crumpàda de la Peroni che la farà serà sö 'l stabilimènt bresà e la tegnarà 'n pé apéna 'l marchio.
Endèl pòst endóche gh'ìa 'l stabilimènt de la Burnàda gh'è stat fat sö 'n cèntro rezidensiàl e comerciàl ciamàt "Borgo Wührer".
Nòm de la società e agn de atività
Modifega1829÷1889 BIRRA FRANZ SAVERIO WUHRER
1889÷1949 FABBRICA BIRRA PIETRO WUHRER
1949÷1970 PIETRO WUHRER S.P.A.
1970÷1981 BIRRA WUHRER S.P.A
1981÷1988 WUHRER S.P.A
