Còsta de Gargnà
|
|
Chest artícol a l'è scricc in Lumbàrt, ortograféa orientàl unificàda. |
Còsta (nòm uficiàl en italià: Costa) l'è 'na frasiù del cümü de Gargnà, en pruvìncia de Brèsa. El paizì el se tróa en mès ai mucc de l'entreotèra de l'Alta Gardezàna, a 750 méter de altèsa sùra 'l leèl del mar, e a 18 km del sò cèntro cumünàl. En Italia l'è giöna de le frasiù che se tróa piö delóns del sò capolöch sòpo de Marina di Ginosa (cümü de Ginosa, en pruvìncia de Taranto) e Pont de le Barche (cümü de Viadana, en pruvìncia de Màntoa).
La g'ha presapóch en sentenér de abitàncc e la se tróa endèla bèla alèta a ridòs de la Alvistì co la quàla l'ìa colegàda per mès de 'na caedàgna che pàsa per la Bóca del Paulù.
Per divèrsi sècoi Costa l'è stat en paés de cunfì, difàti a 'n pér de chilòmetri pasàa el cunfì 'ntra la Repüblica de Venésia e la Contèa del Tiröl, e piö tàrde, 'ntra 'l 1861 e 'l 1918, 'ntra 'l Regn d'Italia e l'Impér Austro-Ungàrich.
La cumunità de Còsta la fà paròchia de per sò cönt, la sò cizulìna l'è dedicàda a San Bartolomé.