Disaster de Seves

Quell articol qì l'è scrivud in Lombard, cond l'ortografia Scriver Lombard.

Ol disaster de Seves l'è stait l'incident, sucedid ol 10 de lui del 1976, ind la fabrega ICMESA de Meda, qe l'ha portad a'l sortir de una nivola de diossina TCDD, una sostanza qimega intra i plu tossege. Ol velen l'ha colpid una granda superfix de territore dei comun de la bassa Brianza, sovertut qell de Seves.

Ol bosc piantad in sui lœg del disaster

La nœva del disaster la g'ha havud una granda resonanza ind la opinion publega, e a nivell europee l'ha portad a la diretiva 82/501/CEE, ciamada anca diretiva Seves. L'è staita la prima volta qe la diossina la vegniva for d'una fabrega e la colpiva la popolazion civila e l'ambient vexin. Segond la classifega del 2010 de la rivista Time, l'incident l'è a'l post del vot intra i pejor disaster ambientai de la storia. Ol sit amerigan CBS l'ha metid dent ind i 12 pejor catastrof ambientai de semper.

Despò dei bonifege, in sui lœg plu contaminads l'è stait cread ol Parc natural dei Rogore.

Ind la cultura de massa

Ol cantaodor Antonello Venditti ind el 1976 l'ha componid una canzon in sul disaster, Canzone per Seveso.

G'è dei testimonianze del prim ann despò del disaster ind i liber Visto da Seveso (Laura Conti, 1977) e Una lepre con la faccia di bambina (1978, l'è stait trait anc un film TV).

Ol composidor Vangelis al s'è ispirad a'l disaster per ol so Suffocation. Anca un grup grec (Panx Romana) al cita Seves ind el bran Σκηνοθέτες βίας (Skinothetes vías) del 1987.

Ind el 2001 l'è vegnid for Inochi No Chikyuu: Dioxin No Natsu, film d'animazion japones qe al cunta su qell qe l'è sucedid. Ind el maj 2017 l'è vegnid for ol liber La fabbrica sporca de Vittorio Carreri, qe a l'epoga l'era ol responsabel rejonal de la jestion de l'emerjenza sanitaria per i popolazion colpide.

Riferiments

• (IT) Storia Dell'Incidente