Fevrer

Quest articol chì l'è scrivud in lombard, con la Noeuva Ortografia Lombarda

Fevrer (parnonzia: /feˈvreː(r)/; ciamad anca febrar per analogia cont el talian) l’è el segond mes de l’ann ind i lunari sgiulian e gregorian. El gh’ha de norma domà 28 dì, ma ind i agn besest el ghe n’ha 29. L’è donca el mes pussee curt de l’ann, e el pœul passà senza havégh una luna piena. Fevrer l’è el terz mes de l’inveren meteorologegh ind l’emisferi boreal. Ind l’emisferi austral, a l’è el terz mes de l’istad meteorologega, desgià che l’è compagn de vost ind l’emisferi boreal.

Personifegazzion del mes de fevrer, Joachim von Sandrart

In latin, el nom del mes l’era Februarius, e el vegneva sgiò de februum (‘purifegà’). A gh’era puranca un ritual de purifegazzion ciamad Februa ch’el se tegneva el 15 de fevrer. Sgener e fevrer inn stait i duu mis darer a vesser sgiontad al lunari roman, introdut del Numa Pompili ind el 713 iEC.

I feste de fevrer de la Roma antiga tœuven denter Amburbium, Sementivae (2 de fevrer), Februa (13–15), Lupercalia (13–15), Parentalia (13–22), Quirinalia ( 17), Feralia (21), Caristia (22), Terminalia (23), Regifugium (24) e Agonium Martiale (el 27).

Solmonath (‘mes de la fanga’) e Kale-monath (‘mes di virz’) inn di nom istoregh per fevrer in anglo-sassen. In finlandes, el mes l’è ciamad helmikuu (‘mes de la perla’), referendes a la fioca in sui ram dei arbor che la se deslengua, cont el crejà di gote d’aigua sberlusente. In sloven a fevrer ghe disen svečan, parolla ligada a la festa de la Madona de la Zeriœula. Un’oltra manera per segnà fevrer in sloven a l’era vesnar, ch’el doveva el sò nom a la Vesna, un personasg de la mitologia slava.

I segn zodiegai de fevrer inn aquari – infina al 18 de fevrer – e pess – del 19 inanz. I sò fior inn i viœule, i fior de primavera e i spadon. La preja zodiegal de fevrer l’è l’ametista, simbol de devozzion, saviezza spiritual e sinzeritaa.

Fevrer l’è ancasì considerad el mes de l’amor per via del Dì de San Valentin, la festa di namorad.

Proverbi

• Febrar l’è curt, ma l’è pesg de un turch;
• Sgener e fevrer, la nev ai pee.

Olter proget

Altri progetti

• Wikiquote
• Wikimedia Commons
• Wikivoyage

• Wikiquote el gh'ha dent citazzion de o su fevrer
• Wikimedia Commons el gh'ha dent imagin o alter archivi su fevrer
• Wikivoyage el gh'ha dent Informazzion turisteghe su fevrer