Henry Ford
|
Chest artícol a l'è scricc in Lumbàrt, ortograféa bresàna moderna. |
Henry Ford (Dearborn, Michigan, 30 de Löi del 1863 – Dearborn, Michigan, 7 de Bril del 1947) l'è stat el fondadùr de la aziènda Ford Motor Company e pàder de le cadéne de montàgio modèrne per la prudusiù sö grànda scàla.
La 'ntrudusiù de la Ford T endèl mercàt automobilìstich la g'ha rivulusiunàt el sistéma de traspósrt e 'l panoràma 'ndüstriàl endèi Stàti Ünìcc. L'è stat n'inventùr prulìfich che g'ha utignìt 161 brevècc registràcc. Cóme ünich padrù de la aziènda Ford, l'è deentàt giöna de le persùne piö sciòre e cunusìde del mónt.
A lü se ghe atreböés apò a 'l fordìsmo, cioè 'l sistéma 'ndüstriàl e econòmich che, per mèzo de 'na organizasiù precìza de la produsiù e la creasiù de la cadéna de montàgio per tègner i prése del prodót bas de 'na bànda e 'na pulìtica de retribusiù bastànsa àlte de l'ótra, el permèt ai lauradùr de guadegnà asé de püdì compràs el prodót che i fàbrica e 'n chèsta maniéra sostègner l'economìa del sistéma.
Aisebé che Ford el gh'ìes 'na edücasiù piötóst limitàda, el gh'ìa 'na viziù globàla, con el consumìsmo come ciàf de la pàce sociàl. El fòrte 'mpègn vers la ridusiù dei cósti el g'ha portàt a 'na gran quantità de 'nvensiù tècniche e comerciài, come per ezèmpe en sistéma de franchìge che g'ha pirmitìt de mèter en pé 'na rét de concesionàrie che la tocàa töte le cità de l'Amèrica e del Cànada e le piö grànde cità de töcc sés i cuntinèncc.