Hospitalitas
|
Quell articol qì l'è scrivud in Lombard, cond l'ortografia Scriver Lombard. |
L'hospitalitas l'era un istitud jurideg ativ ind el tard Impero Roman, per ol qual i citadin i era obligads a dar un terz de la so cà ai soldats imperiai, se i g'hera mìa un post indovè alojar. I era esentads i dotor, i professor, ol cler, i armijer e i pitor.[1]
Trœpe imperiai Modifega
A causa dei frequents abus (ciamads salganum) contra i padron de cà, divers imperador, comè Costanz II, Teodosi I, Teodosi II e Justinian I, i ha fait dei lej per circar de fermar-i, ma senza risultats.[2]
Popoi jermanec Modifega
Foederati Modifega
Plœ tarde, a partir de la fin del IV e la prima mitaa del V secol, l'hospitalitas l'è staita mìa aplicada adoma per i soldats imperiai, ma anc per i foederati qe i s'era stanziads a l'intern de l'Impero: quand qe i se stabiliva ind un territore col permess de l'imperador, i g'era daits un terz dei rendide dei terre (o dei tasse) de la rejon. In cambe, i g'hera de jurar fedeltaa a l'imperador e dar-g sostegn militar, ma i mantegniva la so indipendenza.
I Visigots Modifega
Ind el 418 l'imperador Onofri e 'l general Costanz i ha mandaits i Visigots in Aquitania (una rejon de la Gallia meridionala), ind la vall de la Garona. I barbar, sœ la bas de l'hospitalitas, i ha ricevid un terz dei cà e dei terre de coltivar, perqè i era (anc se adoma su la carta) soldats de l'Imper. I era anc esentads del pagar i tasse. A diferenza dei soldats, però, la concesion l'era definitiva e mìa a temp.[3] Ol territore, de jure, l'era anc'mò de l'Impero: per un poo de temp, i fonzionare civil roman i ha seguitad a operar ind la rejion.[4]
Regn barbareg Modifega
Ind i Regn barbareg l'hospitalitas l'è staita dovrada come bas juridega per regolar i raports intra i popolazion jermanege e qelle latine. In cambe del terz del territore, i nœv rivads i dava protezion ai roman, senza tocar la strutura sociala.[5]
I Lombards Modifega
I Lombards, a'l prencepe, i ha dovrad l'hospitalitas mìa come un contrat intra i do popoi, ma come una imposizion unilaterala (faita con la violenza) dei vincidor in sœ i conquistads.[5]
Riferiments Modifega
- ↑ Ravegnani 2009, p. 71.
- ↑ Ravegnani 2009, p. 72.
- ↑ Ravegnani 2012, p. 89.
- ↑ Ravegnani 2012, p. 90.
- ↑ 5,0 5,1 Hospitalitas ind el Dizionario giuridico online Simone Arqiviad qé: [1]