Jacques de Molay
|
|
Chest artícol a l'è scricc in Lumbàrt, ortograféa orientàl unificàda. |
Ol Jacques de Molay (Molay, 1243 – Parigi, 18 de Mars del 1314) l’è stacc l’öltem Gran Maèstr de l’Ùrden di Cavaliér Templàr.
Nasìt in del 1243 a Molay in del Giüra l’è ‘ndài dét in de l’Ùrden di Templàr in del 1265 e l’è deintàt ol Gran Maèstr de l’Ùrden in del 1298.
L’ se troàa a Cipro per combàt cóntra i müsülmà, quando l’è stài ciamàt in Frànsa dal rè Filìpo IV ‘l Bèl che apéna turnàt l’à fai casà dét in galéra, insèma a di óter cavalìer e l’à acüzàt, lü e töt l’Ùrden di Templàr, de ès di erètech. A dìla giösta ‘l rè l’ völìa mèt i mà sö i sólcc e sö i bé di Templàr che i éra mia adóma di fracc-soldàcc, ma, a fórsa de sircà sólcc per pagàs i guère ‘n Tèra Santa, i éra i piö ‘n gamba ‘n Eüròpa ‘n di afàre finansiàre e i éra öna spéce de bànca che la gh’éra la fidücia pò di rè.
Sóta türtüra ‘l Jacques de Molay l’avrès confesàt de ès ün erètech e isé l’è stai mandàt al rògo, menimà l’Ùrden di Cavaliér Templàr l’è stài abolìt, i sö i sólcc e sö i bé i è pasàcc a i Cavaliér Uspitalér, fò che ‘n Frànsa, ‘ndóe i è stài ciapài dal rè.
Quando però l’öltem Gran Maèstr l’è salìt söl patìbol la cambiàt parlà de fati l’à negàt de ès ün erètech e l’à ciamàt a giödése, denàcc al Signùr, ol rè de Fransa e ‘l Papa Clemènt V che i è mórcc töi dù pròpe ‘n chèla an.