Kobane

Chest artícol a l'è scricc in Lumbàrt, ortograféa orientàl unificàda.

Kobanê o Kobanî (ciamàda in àrabo ach Ayn al-Arab) l’è öna sità cùrda che la se tróa in del nòrt de la Sìria söl cunfì co la Türchìa. In del 2004 la gh’éra 44.821 abitàncc, quàze töcc Curdi (89%) con öna quach de àrabi (5%), de türchi (5%) e de arméni (1%).

La stòria

La sità l’è nasìda ‘ntùren a la stasiù di tréni tiràda ‘n pé in del 1912 da la ‘mpréza todèsca Koban Railway Company sö la lìnea che la ména a Bagdad. I cùrdi alùra i à tacàt a fà sö di cà ‘ntùren a la stasiù, pò i è riàcc in del 1915 i arméni che i scapàa dal genocìdio ‘n Türchia. A la metà del sécol XX i gh’éra ‘n Kobane 3 céze arména, ma quàze tócc i arméni in di agn ’60 del sécol XX i è ‘ndàcc a stà in de la Repüblica Socialista Soviètica de l’Arménia.

Dòpo che l’è s-ciopàda fò la guèra civìl in Sìria i Unità de Protesiù Popolàr cùrde, ol Yekîneyên Parastina Gel o YPG, i à ciapàt la sità ol 19 de löi del 2013 e i spéra de rènt indipendènt chèsto tòch de Kurdistàn che ‘l se tróa ‘n Siria. Ol 02 de löi del 2014 la sità l’è stàcia tacàda dal Istàt Islamèch del Irak e del Levante, alùra i cùrdi i è scapàcc in Türchia e in de la sità l’è stàcia guèra stràda per stràda tra i peshmerga cùrdi e chèi de l’Isis.