Lombard Quell articol qì l'è scrivud in Lombard, cond l'ortografia Scriver Lombard.

Ol Men l'è un fium de la Jermania, afluent de dreita del Ren ; cont 524 km de longeza (574 se se considera anca la broca sorjentifera plussee longa dei so do) l'è ol plussee grand intra i so tributari. Al nass ind el stat federal de la Bavaria e al traversa anca ol Baden-Württemberg e l'Assia.

Ol percors del Men ind la Jermania.
Ol Men a Würzburg.

Al se forma de l'union de duu fiumexei plussee picinits, ciamads Men Ross (50 km) e Men Bianc (41 km), arent a'l paesot de Kulmbach ; de lì al taia la rejon ciamada Franconia cont un andar a zigzag. Ind el so cors al bagna citaa comè Würzburg, Offenbach, Francofort in sul Men e dei oltre ; al se buta de dent ind el Ren intra Mainz-Kostheim (quarter de la citaa de Wiesbaden) e Gustavsburg, pressapoc in mira a la citaa vegia de Magonza.

Ol fium l'è de granda importanza per ol trafeg comercial in Jermania : 384 km prima de la so boca ind el Ren al se destaca un canal de comunegazion q'al collega ol Ren cont ol Danubi (ciamad defait Canal Ren-Men-Danubi). Per permeter-g ai nav de rivar-g, a quell pont lì, ind i ann è stait fait gross lavorar de sistemazion idraulega del fium.