Minority SafePack

Quell articol qì l'è scrivud in Lombard, cond l'ortografia Scriver Lombard.

Minority SafePack
Firmar

Minority SafePack - one million signatures for diversity in Europe (lombard: Paqet de tutela di minoranze - vun million de firme per la diversitaa in Europa) l'è una Iniziativa dei Citadin Europee per i dreits dei minoranze ind la UE, sostegnida de la FUEN.

Contegnid

Ol proponiment rejistrad de la Comission Europea l'è staita sintetizada insé dai so promotor:

• Racomandazion a la UE per la protezion e la promozion de la diversitaa culturala e lenguistega
• Program de finanziament per i comunitaa lenguistege picinine
• Creazion de un Center per la Diversitaa Lenguistega
• Jontar ai obietiv dei fonds rejonai europee la protezion dei minoranze nazionai e la promozion de la diversitaa culturala e lenguistega
• Far ativitaa de ricerca su 'l valor jontad dei minoranze ai noste societaa e a l'Europa
• Rivar a l'ugualianza per i minoranze senza stat (per esempe i Rom)
• Una singola lej Europea in sul copyright, per permeter a tuts de usufruir dei servizi e dei trasmission ind la so lengua mader
• Libertaa de servizi e de ricezion per i contegnids audio-visiv ind i rejon dei minoranze
• Esenzion per ol sostegn rejonal (statal) per la conservazion dei culture, media e beni culturai dei minoranze.

I do proposte rijetade de la Comission Europea:

• Una diretiva, regolament o decision del Consili su la bas del articol 20, paragraf 2, TFUE e del articol 25 TFUE, per rinforzar a 'l intern de l'UE 'l post dei citadin qe i fa part d'una minoranza nazionala, per sigurar qe i so lejitime preocupazion i sives ciapade in considerazion ind l'elezion dei member del Parlament europee;

• Misure utele per frontar la discriminazion e sostegnir la paritaa de tratament, anc per i minoranze nazionai, in particolar cond una revision dei diretive qe i g'è jamò del Consili su la disparitaa de tratament, su la bas del articol 19, paragraf 1, del TFUE.

Desbœta

La Comission Europea a'l prencepe l'ha refudad de rejistrar l'iniziativa, ind el 2013. I autor (qe i comprend Hunor Kelemen, Anke Spoorendonk, Karl-Heinz Lambertz, Luis Durnwalder e Valentin Inzko) i ha dait su recors, con l'aiut de l'Ungeria. La Comission l'era inveci sostegnida de Slovaqia e Romania. Ol Tribunal l'ha nullad la decision de la Comission ind el fevrer 2017. Ind el marz 2017 la Comission l'ha decidid de inviar la regoida dei firme per 9 dei 11 proposte de l'iniziativa.

Regoida dei firme

La regoida dei firme (faita sia online qe offline) l'è començada ind el avril 2017, con la scadenza fissada per ol 3 avril 2018.

L'iniziativa l'è staita sostegnida del Parlament Basc e del Parlament de Navarra; un invit a firmar l'è stait publegad del sit internet del Parlament de la Comunitaa Jermanofona del Belji.

L'è staita sostegnida anc del President del Parlament Europee e del parlament ungeres.

Ol 22 de marz del 2018 l'è rivad anc'pò ol sostegn de l'Eurorejon Tirol-SudTirol-Trentin.

Ol 23 de marz 2018, segond la FUEN, l'obietiv necessare de catar i firme in set pais de l'Union l'è jamò stait ciapad (Romania, Ungeria, Letonia, Spagna, Danimarca, Slovaqia e Croazia), insema a 900 000 firme.

Ol 29 de maj 2018 la FUEN l'ha deciarad qe anc'pò l'obietiv de tœver un milion de firme l'è stait ciapad.

A'l 4 de avril, segond la FUEN la petizion l'è staita firmada de 1 215 789 citadin de l'Union Europea. Ol numer minim per stat al saress stait ciapad in vundex pais: Romania, Ungeria, Letonia, Spagna, Danimarca, Slovaqia, Croazia, Lituania, Slovenia, Bulgaria e Italia.

Ligam de for

• Sit de l'iniziativa
• Sit istituzional de l'iniziativa