Modesto Varischetti

Quell articol qì l'è scrivud in Lombard, cond l'ortografia Scriver Lombard.

Modesto Varischetti (Goren, provinça de Bergem, 1873 - Kalgoorlie, Australia Ocidentala, 1930) l'è stait un minador de or ind l'Australia Ocidentala qe l'è restait trapolad ind'una cava d'or per nœv dé, in seguet a un temporal qe l'ha lagada ind el marz 1907. Varischetti l'è restait in veta ind una saca d'aria prima de vesser salvad.^[1]

Storia

Modesto Varischetti l'era orijinare de la Vall del Ris, terra de minador. Per far furtuna, l'era emigrad in Australia, come l'era cumun al temp.^[2] L'hiva trovad un lavor ind una cava d'or a Bonnievale, vexin a Coolgardie, Australia Ocidentala.^[1] Ol 19 de marz del 1907 l'è rivad un violent temporal. Ind la cava l'ha començad a indar dent una sfraca de agua, tant qe i circa 40 minador qe i era dree a lavorar i ha fait fadiga a indar de for.^[3] Ol Varischetti al lavorava de per lu dex meter sora ol livell 10, e l'agua l'era rivada fina al livell 9, 20 meter sora ol so coo. La s'era formada però, ind el bux qe l'era dree a scavar, una saca d'aria qe al ga permetiva de respirar e de star sœit.^[3]

Capid qe l'era anc'mò viv, grazie a 'l so responder ai segnai mandads a travers la preda qe la separava ol so livell da qell de sora, i è començads i preparativ per salvar-l, guidads da l'ispetor minerare Josiah Crabb, qe l'ha projetad un tren special per portar do scafandrier, Thomas Hearn e un olter, da Perth, ol plœ prest possibel. L'è rivads anc'pò ol scafandrier de miniera Frank Huges, galles, da la cava South Kalgoorlie.^[2]

Dopo cinq dé qe l'era restait blocad sota la terra, i scafandrier i è rivads a portar-ga del maiar, di candele e i letere per incorajar-l da part di so compagn.^[1] Ol pover Modesto, quand l'hiva vest l'agua qe la ribolliva e la forma spaventosa del scafander, l'hera pensad qe 'l Signor al sives dree a ciamar-l de l'oltra banda.^[3]

Dopo nœv dé, l'agua la s'era sbassada assé da permeter ol passaj a travers la galleria col lassar for almanc ol coo, e insé l'è stait portads in superfix dai scafandrier.^[3]

Dopo 'l so salvataj Varischetti l'è stait ricoverad e l'è tornad al so lavorar sota la terra. L'è mort 23 agn dopo, a l'etaa de 57, per fibrosi.^[1]

Curiositaa

Ind el 1907 Herbert Hoover, plœ tarde President di Stats Unids d'Ameriga, al faxiva l'injegner minerare vexin a Kanowna e l'è stait coinvoljid ind el salvataj.^[1]

Ind la cultura

Varischetti l'è sepellid ind el cimiter de Kalgoorlie. La so tomba l'è segnada da una lapide faita ind el 1987, e l'è part del percors didateg cread dal Kalgoorlie-Boulder Cemetery Board.^[4]

Ol grup folk australian Cloudstreet al parla de la storia de Modesto Varischetti ind una canzon.^[5] L'autor l'è mìa cognossid, e l'è staita trovada ind un libretin de canzon titolad "Moondyne Joe and other Sandgroper Ballads". L'è basada sœ una canzon popolara inglesa, "Down in the Coalmine".

Riferiments

↑ ^1,0 ^1,1 ^1,2 ^1,3 ^1,4 (EN) A Great Survival Sydney Morning Herald, May 5, 2006
↑ ^2,0 ^2,1 (IT) Charlie e l'emigrazione, sit de l'Ecomuseo di Miniere de Goren.
↑ ^3,0 ^3,1 ^3,2 ^3,3 (IT) Descrizion del salvataj faita dal Secolo XX
↑ (EN) Thomson Tess, 2004, Kalgoorlie Cemetery Heritage Walk Trail, published by Kalgoorlie-Boulder Cemetery Board
↑ Ol video sœ YouTube

Bibliografia

(EN) Austen, Tom (1986), The ENTOMBED MINER An account of the rescue of Modesto Varischetti in Bonnie Vale in 1907, St. George Books. ISBN 0-86778-027-4

Ligam de for

[SMH-1] 1,0 ^1,1 ^1,2 ^1,3 ^1,4 (EN) A Great Survival Sydney Morning Herald, May 5, 2006

[ecomuseo-2] 2,0 ^2,1 (IT) Charlie e l'emigrazione, sit de l'Ecomuseo di Miniere de Goren.

[SecoloXX-3] 3,0 ^3,1 ^3,2 ^3,3 (IT) Descrizion del salvataj faita dal Secolo XX

[4] (EN) Thomson Tess, 2004, Kalgoorlie Cemetery Heritage Walk Trail, published by Kalgoorlie-Boulder Cemetery Board

[5] Ol video sœ YouTube

[1]

[2]

[3]

[4]

[5]