Put de Zanà

Chest artícol a l'è scricc in Lumbàrt, ortograféa orientàl unificàda.

Put de Zanà, (o apò Put de Zenà; en Italià: Ponte Zanano) l'è 'na frasiù del cümü de Sarès, en Val Trompia, pruvìncia de Brèsa. L'è strersàda de la Mèla e la ciàpa nòm pròpe de 'n put de época medievàla, amò 'n üzo, che pirmitìa a la stràda che minàa 'n val de streersà 'l fiöm.

Put de Zanà 'l se tróa a nort de la frasiù de Zanà e la cunfìna a nort col cümü de Gardù. L'abitàt l'è colocàt pròpe a la 'mbocadüra de la Al de Gombio, 'na lateràla sö la dèstra orogràfica de la Al Trompia, percurìda zamò dei tép antìchi de 'na vìa de cumunicasiù che coléga la bàsa àl col Lach d'Izé, la Al Camònega e la bergamàsca, e al dé d'encö de la stràda pruvinciàla SP BS-48 che la se diràma de la stràda pruvinciàl BS-345 (ciamàda de le Trè Ai) pròpe a Put de Zanà.

En época medievàla, facilmènt co l'edèa de renforsà l'organizasiù difensìva de la àl, a Put de Zanà gh'ìa stàt fat sö 'na fortèsa ciàmada "Testaforte". I prim docümèncc che i atèsta l'ezistènsa de chèsta fortèsa i è del 1323.