3D Pinball: Space Cadet
|
Quest articol chì l'è scrivud in lombard, con la Noeuva Ortografia Lombarda |
3D Pinball: Space Cadet (cognossud anca 'me Pinball 3D o domà 'me Pinball) l'è un videosgioeugh de flipper per el Microsoft Windows, dad insema cont el Microsoft Plus! in del 1995 e poeu mitud dent con Windows NT, Windows Me, Windows 2000 e in Windows XP, foeura che in di edizzion per Itanium. El sgioeugh a l'è stad desvilupad de Cinematronics, LLC e l'è vun di nivei del Full Tilt!Pinball de la Maxis, del 1996.
| 3D Pinball: Space Cadet videosgioeugh | |
|---|---|
| Piataforma | Microsoft Windows |
| Data de sortida | 1995 |
| Gener | Fliper |
| Tema | Fantascenza |
| Origin | Stat Unid |
| Desvilup | Cinematronics, LLC |
| Publegazzion | Microsoft |
| Modalità de sgioeugh | Giocator singol, multigiocator |
| Periferiche de input | Tastadura e mouse |
| Suport | CD-ROM (dent anca a di alter prodot) |
El sgioeugh
ModifegaEl sgioeugh a l'è compagn de 'n classegh flipper, con l'obietiv de fà minga borlà dent la balleta grazzia ai do alete, che se moeuven cont di boton in su la tastadura o quei del mouse.
El flipper a l'è mostrad in prospetiva tridimensional fissa e 'l gh'ha di element reai compagn de rampe e respingent. Al fianch a gh'è un tabellon che 'l mostra i pont, a imità un tabellon ver a LED.
Storia
ModifegaL'è sortid in do version: vuna per el Windows, ciapada in licenza de la Microsoft e de meter dent al sistema per mostrànn i capacità grafeghe e de sgioeugh, e vuna dent Full Tilt! Pinball.
Scrivud in origin per la pupart in Assembly x86, soratut per el motor del son, l'è stada portada in C del Dave Plummer inscì de vesser compatibil cont i varie piataforme che 'l Windows NT el gh'era, ossia MIPS, Alpha e PowerPC. La version original per el Windows la va domà a 640x480, menter quella original la gh'haveva trè resoluzzion, fina a un massim de 1024x768.
Anca se l'è un adatament assee fedel, a gh'è una quaj diferenza in tra la version Windows e quella de Full Tilt!
Fin
Modifega3D Pinball l'è stad tolt via a partì del 2005 de Longhorn e di version per Itanium de Windows XP. La Microsoft, in d'un articol del Raymond Chen, l'ha did de un bug che, in sui 64 bit, el faseva problema cont el rilevà di collision, e donca la balleta la passava senza vesser fermada di element del sgioeugh e che, cont un codes sorgent vegg, hann preferid toeull via inveci che scrivél ancamò o menà domà un element a 32 bit in di sistema a 64 bit[1]
Quella tesi chi però l'è stada contestada de alter informategh, che hann trovad di version che fonzionen - con di difet grafegh piscinit - a 64 bit, sia in su la piataforma AMD, quella pussee doperada anca incoeu, sia in su quella per la segonda version de Itanium, indova che però l'era minga caregada in del sistema. Hann anca mostrad come el doperà de numer a precision dobia l'havaria podud dà el bug che la Microsoft la diseva, roba ben possibel cont i prim compilator sperimentai per la piataforma. El sgioeugh el gh'era anca in di version de Longhorn prima de la repartenza del desvilup.[2]
In del 2022 el Chen l'ha respondud e l'ha did che 'l sistema indova che gh'era 'sto bug chi a l'era l'Alpha AXP, doperada de la cà de Redmond 'me sistema de desvilup intant che vegniven foeura i Itanium e che poeu, per una sistemazzion del compilator o 'na roba compagna, l'ha fonzionad in sui alter piataforme e l'è stad mitud ancamò.[3]