Ambra (raza)

L’ambra l’è la raza fòsile che la é fò da i piante, sura de töt pighér, àes, pì, ma ach serès, ecc e che col tèp, a belazì a belazì, l'è dientada düra.

Ü tòch de ambra con dèt öna furmiga

L’ambra l’è trasparènta e la gh’à ü culùr che l’ và dal zalt, al rós, al marù e de spès la gh’à dét di insècc, di fòie e di óter laùr del gèner che i è restàcc dét ‘ntàt che la raza la culàa zó da la pianta e i è stacc isè conservàcc per di miliù de agn.

L’è dovrada per fà di oregì, di anèi e di óter zoèi, ma ach pipe, mànech de bastù, ecc e la se la tróa ‘n di paìs del Bàltech e 'n Germania, ma ach ‘n Romania, ‘n Sicilia, ‘n Birmania e ‘n de la Repüblega Düminicana.

Storia

L’Ambra l’è sèmper istacia cunsiderada presiùza fina da la preistoria e se n’è sèmper facc ü gran tràfech, tat che zamò i antìch gréci i l’ la dovràa e i l’la congnusìa isé bé de ila ciamada elktron (Ελήκτρων), dezà che a sfregala la se carga e la diènta elètrega.

Ol tràfech de ambra l’éra dientàt isé ‘mportànt de fà nas öna Via de l’Ambra che la traersàa fò i paìs del Bàltech e la Rusia e l’éra lónga piö de 400 chilòmeter.

L’ambra del Bàltech

L’ambra piö cognusida l’è l’Ambra del Bàltech che l’è la piö ciara e l’ sò nòm precìs l’è sucinite, dezà che la gh’à dét tat acido sucìnich.

I giacimèncc del Mar Bàltech i è i piö grancc al mónt e i è cognusìcc fin da la preistoria.

L’ambra Düminicana

Ün óter tipo de ambra l’è chèla düminicana che la se la tróa ‘n de la Repüblega Düminicana e l’è ciamada retinite.