Anema
|
Quest articol chì l'è scrivud in lombard, con la Noeuva Ortografia Lombarda |
L’anema (poeticament anca alma) a l’è un concet filosofegh e religios comun ind la pupart di religion; l’è retegnuda coma la part inmaterial, spiritual e eterna de un vesser vivent, e l’è donca distinta del corp fisegh.[1] Es reten che la consista ind la conzienza e ind la personalitaa del vesser in quistion e che la pœuda vesser un sinonem de spiret, ment o sè.[2] In teologia, es cred despess che l’anema de una persona la vaga inanz a viver depos la mort, e una quaj religion la dis che tute i aneme inn faite su del nœuv del Dia unegh.
“Anema” e “spiret” inn di termen che vegnen dovrad ind una fœusgia compagna, ancaben che i gh’haiven dei acezzion un zich deverse.[3] De sora maross, anca i parolle “anema” e “siche” pœuden vesser considerade coma di sinonem, anca se “siche” la gh’ha di connotazzion pussee fiseghe, quand che “anema” l’è pussee connessa a la metafisega e a la religion.[4]
L’anema – segonda una quaj tradizzion religiosa e filosofega – a l’è el prenzipi spiritual e inmaterial che el fa part di vesser uman, e l’è spartid del corp. A gh’è di scœule che creden che l’anema la pertegna anca ai bes’ce e ai piante, e minga nomà ai homen. In sgeneral, l’anema l’è conzepida coma un prenzipi che el ven del dedenter, che l’è la font de tute i fonzion fiseghe e, in partigolar, dei ativitaa mentai. Gh’è ancasì di filosef che retegnen che l’anema l’esista minga del tut e che, donca, la ment la sariss nomà una part del corp, e nò de un’anema inmaterial.
Ind el cors de la storia, una mota de persone hann provad a despiegà el conzet de “anema”: a partì del dualisem intra idealisem filosofegh e gnos, a rivà a l’interpretazzion esistenzialista di prenzipi del material e de l’inmaterial.
Referenze
Modifega- ↑ Encyclopædia Britannica
- ↑ Encyclopædia Britannica
- ↑ J Hillman, Un fuoco blu: scritti selezionati di James Hillman (in inglese), HarperPerennial, 1989, 112–129.
- ↑ J Hillman, Un fuoco blu: scritti selezionati di James Hillman (in inglese), HarperPerennial, 1989, pp. 20.
Ligam de denter
ModifegaLigam de fœura
Modifega
Wikiquote el gh'ha dent citazzion de o su anema
Wikimedia Commons el gh'ha dent imagin o alter archivi su anema
