Apostuj Capitel Set

Quel articul chì l'è scrivüü in Lumbard, cun l'urtugrafia insübrica ünificada.

Apostuj

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Set

¹E 'l sacerdott scèff l'ha dii: «Stann chèstcoss inscì?» ²E l'ha dii: «Omen, fradèj, e pader, scultee. El Diu de la gloria l'è cumparii al noster pader Abraham quand l'era in de la Mesuputamia prima che l'è staa de cà a Caran ³e 'l gh'ha dii: Vén föra de la tua tèra e la tua parentela, e vén a la tèra che te faruu vedè. ⁴Alura despö che l'era vegnüü föra de la tèra di Caldee, l'è staa de cà a Caran. E là, despö che 'l sò pader l'era mort, el l'ha faa emigrà in de chèsta tèra che vialter adèss stii de cà, ⁵e 'l gh'en ha minga daa un'ereditaa né un post per el sò pee, e l'ha prumèss de dàll cuma una pussessiún a lü e a la sua suménza despö de lü, ancabén el gh'aveva minga bagaj. ⁶E Diu l'ha parlaa inscì: che la sua suménza la sarìa furestee in d'una tèra furestee, e lur i farìen s'ciav e i strapenarìen quatercènt agn; ⁷E la naziún a la qual sarànn s'ciav giüdegaruu mì, Diu l'ha dii, e despö de chèstcoss vegnarànn föra e me servarànn in de chèst lögh. ⁸E 'l gh'ha daa l'acordi de la circuncisiún; e inscì l'ha generaa Isaac e 'l l'ha circuncis in de l'utav dì, e Isaac Giagum, e Giagum i dudes patriarch.
⁹E i patriarch, perchè gh'aveven invidia a Giüsepp, l'hann vendüü in d'Egitt. E Diu l'era cun lü, ¹⁰e 'l l'ha liberaa de tücc i sò tribulaziún e 'l gh'ha daa grazia e saviéza denanz al Faraon, rè d'Egitt, e 'l l'ha stabilii cuma guernadúr sü l'Egitt e sü tüta la sua cà. ¹¹E l'è vegnüda una carestia sü tütt l'Egitt e 'l Canaan, e una granda tribulaziún, e i noster pader truaven minga paciatoria, ¹²e despö che Giagum l'ha sentii che 'l gh'era paciatoria in de l'Egitt, l'ha mandaa föra i noster pader prima. ¹³E in de la segunda völta, Giüsepp l'è staa faa cugnussüü a i sò fradèj, e la famèja de Giüsepp l'è staa faa manifest al Faraon. ¹⁴E quand Giüsepp el i ha mandaa, l'ha ciamaa Giagum, sò pader, e tüta la parentela, in de personn setanta cinch. ¹⁵E Giagum l'è naa giò in d'Egitt, e l'ha mort, e i noster pader, ¹⁶e hinn staa traspurtaa a Sichem e hinn staa post in de la fosa che l'Abraham l'aveva vendüü a prèzz d'argént di fiöö de l'Emor a Sichem.
¹⁷E cuma el vegniva vesìn 'l témp de la prumèssa che Diu l'ha deciaraa a l'Abraham, la gént l'ha cressüü e l'ha multiplegaa in d'Egitt, ¹⁸fin che l'è cumparii un alter rè sura l'Egitt che l'ha avüü cugnussüü 'l Giüsepp. ¹⁹Chèsta persona, che l'ha süperaa cun fürbizia la nostra raza, l'ha strapenaa i noster pader, per fà i lur bagaj espost perchè scampassen no.
²⁰In de chèll témp, Musè l'è nassüü, e l'era bèll a Diu; lü l'è nütrii per trii més in de cà de sò pader, ²¹quand l'era metüü föra, la túsa del Faraon la l'ha ciapaa sü e la l'ha nütrii a sé medemm cuma fiöö. ²²E Musè l'è levaa in de tüta la saviéza di Egiziann, e l'era capaz in di sò paroll e laur.
²³E cuma la gh'ha cumpii l'etaa de quarant'agn, l'è vegnüü sü in del sò cör a visità i sò fradèj, i fiöö d'Israel. ²⁴E quand l'aveva vedüü vün che 'l fava maa a quajdün, el l'ha defendüü e l'ha faa vendèta per lü che l'era uprèss, mazand l'Egizián. ²⁵E 'l pensava che i sò fradèj avarìen capii che Diu 'l ghe dava salvéza per mèzz de la sua man; ma lur hann minga capii. ²⁶E 'l dì despö l'ha cumparii a lur che eren dree a lutà e 'l i recunciliava a la pas, disend: Omen, sii fradèj, perchè fii maa el vün a l'alter? ²⁷E lü che l'era dree a fà maa al sò prossim el l'ha rüzaa via, disend: Chi 'l t'ha stabilii prenzip e giüdes sura de nümm? ²⁸Tì te vöret mazàmm, in de la manéra che t'hee mazaa l'Egizián iér? ²⁹E Musè l'ha scapaa via a chèsta parola e l'è staa devegnüü in de la tèra de Madian, due l'ha generaa düü fiöö.
³⁰E quand quarant'agn hinn staa cumpii, un angiul el gh'ha cumparii in del desèrt del munt Sinai, in d'una fiama de fögh d'un ruéd. ³¹E Musè, quand el l'aveva vedüü, el s'è meravejaa del spetacul, e intanta che l'era vegnüü vesìn, per usservàll, l'è vegnüda la vús del Signúr: ³²Mì sun el Diu di tò pader, el Diu d'Abraham, d'Isaac e de Giagum. E perchè l'era devegnüü terifegaa, Musè l'ha minga vulzava usservàll. ³³E 'l Signúr el gh'ha dii: Deslengua i sanduj di tò pee, già che 'l lögh sül qual te stee in pee l'è tèra santa. ³⁴Huu certamént vist l'afliziún de la mia gént in d'Egitt, e huu sentii 'l lur suspír, e sun vegnüü giò per liberàj; e adèss vén, te mandaruu in d'Egitt.
³⁵Chèst Musè che aveven refüdaa, disend: Chi 'l t'ha stabilii prenzip e giüdes--chè Diu l'ha mandaa cuma prenzip e liberadúr, cun la man de l'angiul che 'l gh'ha cumparii in del ruéd. ³⁶Chèsta persona la i ha menaa föra, despö che l'ha faa meravèj e sègn in d'Egitt, in del Mar Ross e in del desèrt per quarant'agn. ³⁷Chèst l'è 'l Musè che l'ha dii a i fiöö d'Israel: Diu 'l levarà sü per vialter un prufèta di voster fradèj cuma mé. ³⁸Chèst l'è lü che l'era in de l'assamblea in del desèrt cun l'angiul che 'l gh'ha parlaa in del munt Sinai e cunt i noster pader, che l'ha ricevüü uracuj vivént per dàv, ³⁹al qual i noster pader hann minga vursüü devegnì übediént, ma l'hann rüzaa via e s'hinn giraa via in di lur cör a l'Egitt, ⁴⁰disend a l'Aharon: Fa per nümm di che andarànn denanz a nümm: già che chèst Musè, che 'l m'ha menaa föra de la tèra d'Egitt, savèmm no che cossa la ghe sia sücess. ⁴¹E hann faa un vedèll in de quij dì e hann ufèrt un sacrifizi a l'idul e eren cuntént in di oper di lur man. ⁴²Ma Diu 'l s'è giraa e 'l i ha cunsegnaa al servizi l'esèrcit del cél cuma l'è scritt in del liber di prufètt:
M'avii ufèrt vitìmm e sacrifizi
per quarant'agn in del desèrt, cà d'Israel?
⁴³E avii levaa sü la ténda de Moloch,
e la stèla del diu Remfan,
i imagen che avii faa per aduràj,
e ve faruu emigrà ultra Babilonia.
⁴⁴La ténda de la testimunianza che i noster pader gh'aveven in del desèrt cuma l'ha urdinaa Lü che l'ha parlaa a Musè de fàll, segund la furma che l'aveva vedüü; ⁴⁵chèla che, despö che l'hann ricevüü a la lur völta, i noster pader hann purtaa denter cun Giüsuè in de la pussessiún di naziún, i quij Diu l'ha rüzaa föra denanz a i noster pader fin a i dì de David, ⁴⁶che l'ha truaa grazia denanz a Diu e l'ha dumandaa de truà una ténda per el Diu de Giagum. ⁴⁷E Salumún el gh'ha faa sü una cà. ⁴⁸Ma el Püssee Alt el sta no de cà in de lögh faa de man, cuma el prufèta 'l dis:
⁴⁹El cél l'è 'l mè tron,
e la tèra l'è 'l scagn di mè pee;
che géner de cà me farii, el dis el Signúr,
o che cossa la sarà 'l lögh del mè requià?
⁵⁰L'ha minga faa la mia man tütt chèstcoss?
⁵¹Omen dür de coll e incircuncis di cör e di urègg, vialter resistii semper al Spirit Sant, cuma i voster pader, anca vialter. ⁵²Chi di prufètt hann minga persegütaa i voster pader? E hann mazza quij che hann nunziaa prima la vegnüda del Giüst, del qual adèss vialter sii staa devegnüü tradidúr e assassìnn, ⁵³vialter che avii ricevüü la lég in de l'urdinanza di angiuj e l'avii minga usservaa!».
⁵⁴E quand aveven sentii chèstcoss, eren aflitt in di lur cör e masnaven i dént sura de lü. ⁵⁵E già che l'era pièn del Spirit Sant, e despö che l'aveva fissaa i ögg sül cél, l'ha vist la gloria de Diu e Gesü stand in pee a la driza de Diu, ⁵⁶e l'ha dii: «Varda, vedi che i cél hinn dervii e 'l Fiöö del vèss üman stand in pee a la driza de Diu!». ⁵⁷E criand föra cunt una granda vús, hann tegnüü i lur urègg e cunt una sula mént hann curs sü lü, ⁵⁸e despö che l'hann bütaa föra de la citaa, el lapidaven, e i testimon hann metüü via i lur vestii a i pee d'un giüín ciamaa Saul, ⁵⁹e lapidaven Stefan, che l'ha invucaa e dii: «Signúr Gesü, ricév la mia anema!». ⁶⁰E despö che s'è metüü i genögg, l'ha criaa cunt una granda vús: «Signúr, fa minga stà cuntra de lur chèst pecaa!», e despö che l'ha dii chèst, s'è indurmentaa.

Navigaziun

• ← Indree a Capitel Ses
• Inanz a Capitel Vot →
• A l'indes