Apostuj Capitel Vintün

Quel articul chì l'è scrivüü in Lumbard, cun l'urtugrafia insübrica ünificada.

Apostuj

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vintün

¹E cuma l'è sücess che nümm èmm faa véla despö che serum ritiraa de lur, despö che avevum faa un cors dricc, sèmm vegnüü a Kos, e sücessivamént a Rod, e de là a Patara, ²e despö che avevum truaa una nav che la passava sura per Fenicia e serum naa sü a bord, èmm faa véla. ³E despö che èmm vistaa 'l Ciper e l'èmm lassaa dedree a sinistra, èmm navegaa per la Siria e sèmm naa a riva a Tir; già che la nav l'era dree a descargà la carga là. ⁴E despö che avevum cercaa e truaa i discepul, èmm restaa là sètt dì, i quij diseven a Paul de nà no sü a Gerüsalèmm. ⁵E quand l'è sücess che nümm èmm finii i dì, despö che serum vegnüü föra, andavum, intanta che tücc me cumpagnaven, cun donn e bagaj, fin föra de la citaa, e despö che me serum ingenugiaa sü la spiàgia e pregaa, ⁶èmm dii s'ciau, el vün vèrs i alter, e sèmm naa sü sü la nav, e lur hinn turnaa indree a i lur propi robb. ⁷E despö che nümm avevum finii 'l viagg de Tir, sèmm riaa a Ptolemaid, e despö che avevum salüdaa i fradèj, èmm restaa un dì cun lur. ⁸E despö che serum naa föra 'l dì despö, sèmm vegnüü a Cesarea, e despö che serum naa denter in de la cà de Filipp l'evangelista, che l'era vün di sètt, èmm restaa cun lü. ⁹E 'l gh'aveva quater tús vergin, che daven prufezì.
¹⁰E intanta che restavum là tant dì, un cèrt prufèta de nomm Agab l'è vegnüü giò de la Giüdea, ¹¹e despö che l'era vegnüü a nümm e l'aveva levaa sü la cinta de Paul, despö che l'aveva ligaa i sò propi pee e man, l'ha dii: «Chèst el dis el Spirit Sant: Inscì a Gerüsalèmm i Giüdee ligarànn l'omm al qual la partén chèsta cinta e 'l cunsegnarànn in di man di naziún». ¹²E cuma èmm sentii chèstcoss, el pregaven, sia nümm che quij che staven de cà là, de nà no sü a Gerüsalèmm. ¹³Alura Paul l'ha respundüü: «Che cossa fii, piangend e rumpend a pèzz el mè cör? Già che mì sun prunt no dumà a vèss ligaa ma anca murì a Gerüsalèmm per el nomm del Signúr Gesü». ¹⁴E perchè l'era no persuas, serum quiètt despö che avevum dii: «Che la sia sücessa la vuluntaa del Signúr».
¹⁵E despö de chèst dì, despö se serum preparaa, sèmm naa sü a Gerüsalèmm; ¹⁶E quij di discepul de Cesarea hinn vegnüü cun lur, menand cun lur un cèrt Mnásun, de Ciper, un vegg discepul, del qual duvevum vèss daa logg.
¹⁷E quand èmm vegnüü a Gerüsalèmm, i fradèj m'hann ricevüü cun letizia. ¹⁸E 'l dì despö, Paul l'è naa denter cun nümm a Giagum, e tücc i anziann hinn riaa. ¹⁹E despö che 'l i aveva salüdaa, el diciarava a ognidün i robb che Diu l'aveva faa intra i naziún per mèzz del sò ministeri.
²⁰E quij che hann sentii daven gloria a Diu e gh'hann dii: «Te vedet, fradèll, quant des mila gh'hinn intra i Giüdee che hann credüü e tücc hinn zelant de la lég; ²¹E hinn staa infurmaa de buca sü tì, che te insegnet el bandunà de Musè a tücc i Giüdee intra i naziún, disend che lur circunciden no i bagaj né caminen cunt i custümm. ²²Dunca, che cossa l'è? Sentarànn següramént che te see vegnüü. ²³Dunca, fa chèst che te disum: gh'hinn quater omen cun nümm che gh'hann un vod sü lur medemm. ²⁴Ricév tì chèst personn e che te siet faa pür cun lur e paga per lur perchè rasen el cuu, e tücc savarànn che nagott di robb che hinn staa infurmaa de buca hinn, ma anca tì medemm te caminet vardand la lég. ²⁵E sü i naziún che hann credüü, nümm èmm mandaa, avend giüdegaa che lur varden cuntra chèll che l'è sacrifegaa a i idul, el sangh, chèll che l'è strangulaa e furnegaziún».
²⁶Alura Paul, despö che aveven ricevüü i omen el dì despö e l'era faa pür, l'è naa denter in del témpi diciarand el cumpimént di dì de la pürifegaziún, fin del qual l'è ufèrt per ognidün de lur l'ufèrta.
²⁷E cuma i sètt dì staven per vèss cumpii, quand l'hann vedüü in del témpi, i Giüdee de l'Asia hann pruvucaa tüta la fola e hann bütaa i man sü lü, ²⁸criand: «Omen Israelitt, jütee! Chèst l'è 'l vèss üman che l'insegna a tücc depertütt cuntra la gént, la lég e chèst lögh, e püssee anmò, l'ha menaa anca Grech in del témpi e l'ha cuntaminaa chèst lögh sant». ²⁹Già che aveven vedüü prima Trofim de Efés in de la citaa cun lü, el qual pensaven che Paul l'aveva menaa in del témpi. ³⁰E l'intréga citaa l'è staa muvüü, e l'è sücess un curr insèma de la gént e, despö che aveven brancaa Paul, l'aveven tiraa adree föra del témpi e sübit i port hinn staa saraa.
³¹E intanta che cercaven de mazàll, la nutizia l'è nada sü al tribün del cuort che tüta la Gerüsalèmm l'è staa suta-sura, ³²che, despö che l'aveva ciapaa suldaa e centüriún, sübit l'è curüü giò sü lur, e quand hann vedüü 'l tribün e i suldaa, hann cessaa de batt Paul. ³³Alura, despö che 'l tribün l'era vegnüü vesìn, el l'ha brancaa, e l'ha cumandaa che 'l füss ligaa cun dò cadenn, e 'l dumandava chi 'l füss e che cossa l'avess faa. ³⁴Ma alter criaven quajcossa altra intra la gént. E perchè 'l pudeva minga savè la roba següra per via del tümült, l'ha cumandaa che 'l füss purtaa in del castèll. ³⁵E quand l'è sücess sü i basèj, l'è sücess che l'è staa purtaa di suldaa per via de la viulénza de la fola, ³⁶degià che la multitüdin de la gént la vegniva adree, criand: «Töll via!».
³⁷E quand el stava per vèss purtaa in del castèll, Paul l'ha dii al tribün: «M'è lecit dìtt quajcossa?», e l'ha dii: «Te see 'l grech? ³⁸Dunca, te see no l'Egizian che prima de chèst dì l'ha pruvucaa tümült e l'ha menaa in del desèrt i quater mila omen di assassìnn?». ³⁹E Paul l'ha dii: «Mì sun un omm giüdee, de Tars de Cilicia, un citadin d'una citaa che l'è minga scugnussüda; e te preghi, permetemm parlà a la gént». ⁴⁰E quand el l'ha permetüü, despö che l'era staa in pee sü i basèj, Paul l'ha faa un sègn cun la man a la gént. E quand un grand silenzi l'è sücess, l'ha ciamaa in de lengua ebraica, disend:

Navigaziun

• ← Indree a Capitel Vint
• Inanz a Capitel Vintdüü →
• A l'indes