Arpitània
|
Quest articol chì l'è scrivud in lombard, con la Noeuva Ortografia Lombarda |
L'Arpitania (Arpetania in arpitan, Arpitanie in frances) l'è ona region etnolenguistega situada in de la Vuropa ocidentala, spartida incoeu in tra la Franza, la Svizzera e l'Italia. El territori de l'Arpitania el se spantega in sul territori indova che l'è parlada la lengua arpitana, ciamada anca lengua francoprovenzala (lengoua francoprovençâl in arpitan).
L'identitaa arpitana l'è soratut lenguistega, parchè l'Arpitania, despoeu de la formazzion de la Confederazzion Svizzera, la gh'ha mai pu havud l'unitaa territorial e i Paes che fann su el spazzi arpitan inn semper stad ligad a diverse nazzion, donca a nivell storegh i arpitan i gh'hann minga podud desvilupà on'identitaa comuna. De sorapu, l'unitaa lenguistega de l'arpitan in de l'interpretazzion moderna l'è stada desquatada domà in del 1878 del lenguista furlan Graziadio Ascoli,[1] e 'l termin "Arpitania" l'è stad fad su in di agn 1970 del profesor Joseph Henriet.[2]
Geografia
ModifegaLa pupart de l'Arpitania la se troeuva in di Alp Ocidentai, ma la se spantega anca in su la pianura a nord-ovest, fina al Forez e Neocastell.
Definizzion
ModifegaIn Svizzera, squas tuta la Romandia, o ben la Svizzera francofona, la fa part de l'Arpitania.[3] La banda setentrionala del canton Sgiura, però, la fa minga part de l'Arpitania desgià che lilinscì a se parla el francacontes, ona lengua d'oïl.
In Franza, l'Arpitania la ciapa denter la Savoia intrega e 'l Paes Liones, la mitaa setentrionala del Delfinad e i bande meridionai del Franch Contad e la Borgondia. A nivell ministrativ, questi inn i departimencc de Savoia, Volta Savoia, Isera, Ain, Sgiura, Dobis, Saona e Loira, Rodan, Loira, Droma e Ardeca.
In Italia, l'intrega region de la Vall d'Aosta e vot vallade piemontese i fann part de l'Arpitania: vall Soana, vall Orch, vall Granda, vall d'Ala, vall de Viuu, vall Cenis'cia, bassa vall Susa e volta vall Sangon.
In Puja, provincia de Fogia, la gh'è on'isola lenguistega arpitana, ma l'apartenenza de questi territori chì al concet d'Arpitania l'è discutibel.
Poncc estrem
ModifegaQuesti inn i poncc estrem aprossimativ del spazzi arpitan. Desgià che l'arpitan l'è part d'on continuum dialetal, i poncc estrem i poeuden vesser domà aprosimativ.
- Ovest: Noirétable
- Est: val de Lys (comun de Gaby)
- Nord: Tavannes
- Sud: La Mure
Geografia fisega
ModifegaEl Mont Bianch, la montagna pussee volta de la Vuropa ocidentala, el se troueva in de l'Arpitania. La cadena di Alp la traversa in diagonal el territori arpitan, e la spartiss a nivell geografegh la Vall d'Aosta del rest del territori. El massizz del Grand Paradis el separa i vallade piemontese de la Vall d'Aosta, e foeura che d'on senter strecc fiss, el gh'è no on conligament stradal in tra i do zone. El nord-ovest l'è manch montuos - Lion e Ginevra, i do citaa pussee grande de l'Arpitania, i se troeuven in de la pianura. In del nord-est gh'hinn du lagh grand fiss: el lagh Leman e 'l lagh de Neocastell. La banda ocidentala estrema de l'Arpitania l'è quatada di bosch e gh'hinn poch center abitad. Inscì la fonziona 'me on confin natural con l'Ocitania.
.jpg)
Citaa
Modifega| Nom ofizzial | Nom in arpitan | Popolazzion[4] | |
|---|---|---|---|
| 1. | Lyon | Liyon | 513.275 |
| 2. | Genève | Geneva | 198.979 |
| 3. | Saint-Étienne | Sant Etieve | 171.057 |
| 4. | Grenoble | Grenoblo | 160.649 |
| 5. | Lausanne | Losena | 137.810 |
Lengov
ModifegaLa lengua storega e tradizzionala parlada in del territori l'è l'arpitan, che però el gh'ha mai havud el status di lengua ofizziala. In de la Svizzera arpitana e la Franza, la lengua ofizzial e quella voramai maderlengua de la pupart di abitancc, l'è el frances e in Italia l'è l'italian. De sorapu, anca 'l piemontes l'è spantegad in de l'Arpitania italiana, soratut in di vallade arpitane del Piemont, indova che i 70,7% de la popolazzion i cognossen el piemontes.
In de la Romandia l'arpitan l'è voramai squas smorzad, foeura che in d'ona quai citaa in del canton Vales, per esempi Evolène. La Svizzera, de sorapu, la recognoss minga l'arpitan 'me lengua minoritaria, ancaben che l'habia ratifegad la Carta vuropea di lengov regionai.[5]
In Franza l'arpitan el resta an'mò viv in de la pianura de Bressa e in d'ona quai vallada alpina.[3] In Italia, inscambi, l'arpitan l'è pussee viv desgià che l'è protesgiud de la lesg in sui minoranze lenguisteghe,[6] ancaben che la lengua co-ofizziala de la Vall d'Aosta l'è semper el frances, che l'è maderlengua de manch de 1% di abitancc.[7] In de la Vall de Lys, part de la region autonoma de la Vall d'Aosta, l'è parlad el walser, dialet de la lengua alemana.
_-_panneau_entr%C3%A9e.jpg)
Arpitan famos
Modifega- Joseph-Samuel Farinet (Val d'Aoste 1845, Valais 1880), «Robin des Bois» arpitan.
- Louis Mandrin (1724-1755).
- Amélie Gex, poeta.
Ligamm da foeura
Modifega
Referimencc
Modifega- ↑ Ascoli, Graziadio Isaia (1878). Schizzi Franco-provenzali. Archivio glottologico italiano, III, pp. 61–120.
- ↑ "Nos ancêtres les Arpitans" https://web.archive.org/web/20110715171257/http://blog.regionleman.com/public/Arpitanie/Histoire_Arpitanie_24heures.pdf
- ↑ 3,0 3,1 https://www5.unine.ch/revuepresse/38264192_15-03-2010-tdg-ch_Weblogs_Tribune_de_Geneve-LARPITAN___ROMANDS_ET_RHONE.pdf Arqiviad qé: [1]
- ↑ Insee https://www.insee.fr/fr/statistiques/4277602?sommaire=4318291
- ↑ Council of Europe https://www.coe.int/en/web/conventions/full-list?module=signatures-by-treaty&treatynum=148
- ↑ Lingue di minoranza in Italia https://www.miur.gov.it/lingue-di-minoranza-in-italia
- ↑ Fiorenzo Toso, Le minoranze linguistiche in Italia, Editrice Il Mulino, 2008
Bibliografia
Modifega- Jozé Harrieta, La lingua arpitana, 1976
- Passeport, Comunôtâ culturèla arpitana - Eronacion Arpitania, 2006
Olter proget
Modifega
Wikimedia Commons el gh'ha dent imagin o alter archivi su Arpitània
'