Attacch informategh a la Banca del Bangladesh
L'attacch informategh a la Banca del Bangladesh el gh'è staa in del fevree 2016 quand che di cracker s'hinn infiltraa in del sistema de la banca e han mandaa cont el sistema SWIFT trenta-cinch transanzion per squasi on miliard de dollar di cunt che partegnen a la Banca del Bangladesh in su la Federal Reserve Bank of New York. Cinch di trenta-cinch transazion a hinn staa bone de rivà a conclusion e han menaa in di man di criminaj 101 milion de dollar: 20 in Sri Lanka e 81 in di Filippinn: Tucc i danee rivà in Sri Lanka a hinn staa recuveraa menter quej in di Filippinn a hinn staa in part prelevaa e doperaa.
Event Modifega
In tra el 4 e 'l 5 de fevree del 2016, venerdì e di de festa in l'islamich Bangladesh, i lader riessen a bloccà la stampanta di transazion e fann di transazion abusiv cont di credenziai otegnuu prima cont on malware, se pensa el Dridex, per squasi on miliard de dollar, di cunt in la Federal Reserve americana doperaa del Bangladesh per el commercc internazional. La domenega, finii el weekend islamich, i tecnech del Bangladesh riessen a reparà la stampanta e se renden cunt di 'sti transazion e ciamen i Stat Unii, che però hinn saraa per la soa festa. Per fortuna la pupart di transazion a hinn mittuu in revision a man perchè el nomm doperaa l'è, per coincidenza, arent a quell de 'na compagnia sanzionada per avè vioraa i sanzion contra l'Iran, e donca a hinn poeu bloccaa el lunedì di operator american, che riceven anca l'allarm di collega del Bangladesh. 'N oltra transazion de 20 milion, segnalada del Sri Lanka per l'import volt, a hinn inveci fermaa de la Deutsche Bank per on error de battitura: Di bonifich a eren intestaa a 'na fantomatega "Shalika Fandation" e l'error l'ha menaa i todesch a ciamà la banca del Bangladesh, che l'ha bloccaa i transazion.
Del miliard del principi a hinn restaa domà 81 milion che hinn rivaa in di Filippin, in quatter cunt individuaj vert in del magg 2015 a la banca Rizal Commercial Banking Corporation - poeu multada di autorità del Pajes per el mancaa controll - e hinn staa in part retiraa. A la fin el s'è descovert che la banca bengalesa la doperava 'n sistema de segonda man, senza 'n firewall e scarsament protegiuu.
Possibil colpevol Modifega
L'FBI l'ha parlaa de 'n possibil coinvolgiment de la Republega Popolara Democratega de Corea e del sò Lazarous Group, el grupp nordcorean che 'l se occupa de hacking de Stat, e 'n poo de compagnij han parlaa de modalità compagn de quej doperaa per l'attacch de la Sony Picture Entertaintment per el film The Interview. In del 2018 i Stat Unii han accusaa 'n nordcorean per 'sto attacch, per quell a la Sony e per el ransomware Wannacry.