Augusto Anfossi
Augusto Anfossi (Nizza, 1812 - Milan, 21 de marz del 1848) l'è staa on patriota italian.
Fioeu del sur Giuseppe Pietro Anfossi, a l'è staa educaa di Gesuita e quella robba chì la gh'è minga piasuda, inscì l'è staa mandaa via in Francia, indove l'ha servii l'esercit frances. Tornaa in del Regn de Sardegna, l'è entraa in de l'esercit piemontes e l'ha tolt part ai mott revoluzionari del Piemont in del 1831. Quand quei là hinn andaa a tocch l'è scappaa prima in Francia (indove l'è entraa a fà part de la Legion Foresta) e poeu, in del 1833, in Egitt. Chichinscì el s'è miss al servizzi de l'esercit de Ibrahim Pascià e l'ha ciappaa el grado de colonnell (1839) col combatt in Sudan e contra i Turch.
Lassaa l'esercit, l'ha scominciaa on'attività de mercant tra l'Egitt e l'Algeria; poeu l'ha viaggiaa on poo per l'Europa. Tornaa in Italia in del 1848, l'è passaa de Milan; ghe se trovava domà de pocch settemann quand che l'è s'cioppada la sommossa popolar contra i Austriegh, che l'ha portaa ai Cinch Giornad de Milan. L'Anfossi el s'è s'ceraa coi Milanes e l'è vegnuu vun di comandant de la rivolta. L'è staa lù che l'ha pientaa el Tricolor a Porta Noeuva, dopo che l'eva scasciaa via on grupp de grenadee austriegh che gh'eren sconduu. El vintun de marz l'era dree a cargà el Palazz del Genio cont in man on cannonscin de bronz e l'è staa coppaa de ona s'cioppettada.
El gh'ha 'vuu on fradell ciamaa Francesco, che l'ha tolt part anca lù ai event del Resorgiment.
Font Modifega
- Raffaele Bagnoli, Le strade di Milano, 1971, vol. 1, pag. 64, ed. Effetti.
- Dizionario Biografico degli Italiani
- treccani.it