Bataia de Pavia (1525)

Quell articol qì l'è scrivud in Lombard, cond l'ortografia Scriver Lombard.

La bataia de Pavia, combatida ind la matina del 24 fevrer del 1525, l’è stait ol sconter decisiv dei Guerre d'Italia del 1521-1526 intra ol Regn de França e l’Imper dei Asburg del Carl V, imperador del Sacr Roman Imper e sovran de la Spagna, de l’Austria, dei Pais Bass e dei Do Sicilie.

L’armada francesa l’era guidada del re Francesc I de França, qe l’ha assediad la citaa de Pavia (allora part del Ducad de Milan a l'intern del Sacr Roman Imper) ind el otover del 1524 con 26200 soldads. La fanteria francesa l’era formada de 6000 soldads a pè frances e 17000 mercenari forester: 8000 svizer, 5000 todesc e 4000 italian (Bande Nere). La cavalleria francesa l’era formada de 2000 jendarm e 1200 lance. Ol Carl V, qe al g’hiva l’intenzion de s'ciepar l’assede, l’ha mandad un'armada de 22300 soldads de socors a Pavia (indove la stazionava la guarnijon imperial de 5000 todesc e 1000 spagnœui) sota ol comand del fiaming Carl de Lannoy, tenent imperial e vice-re de Napol, e del renegad frances e capitan jeneral Carl III, duca de Borbon. I olter plussee importants comandants i era la guida militar tedesca Georg Frundsberg, e ol capitan spagnœl Antonio de Leyva, qe l’era a'l comand de la guarnijon a l’intern de Pavia. La fanteria asburg l’era formada de 12000 todesc (Lansqenet), 5000 spagnœui e 3000 italian. Ind la fanteria, i arqibujer imperiai i faxiva part dei colonei spagnœui e dei Doppelsöldner todesc. La cavalleria imperial l’era formada de 1500 cavaller e 800 lance.

La bataia l’è staita combatida ind ol parc Viscontee de Mirabell de Pavia, fœra dei mure de la citaa. L’armada francesa l’è staita spartida e batida separadament ind una bataia de quater ore. Tants nobei frances i è staits copads e dei olter, cond anc ol Francesc I, i è staits caturads.

Ol Francesc I l'è stait imprexonad ind la vexina torr de Pizigiton e despos l'è stait trasferid in Spagna, indove al stava ol Carl V per ol so prossem matrimone con l'Isabella de Portugall. Insema i ha firmads ol tratad de Madrid del 1526, col qual ol Francesc l’ha bandonad i so rivendicazion in su 'l Ducad Imperial de Milan e l’ha dait la Borgogna a la Cà d'Asburg in cambe de la so libertaa. Ol Francesc, però, l’ha denonziad ol tratad dop de la so liberazion e prest l’ha dervid anc'mò i ostilitaa per la Borgogna e Milan.

Referiments

(EN) Battle of Pavia, in su Oxford Reference.
(EN) Battle of Pavia, in su Enciclopedia Britannica.
(IT) Andrea Frediani, La storia del mondo in 1001 battaglie, Newton Compton Editori, 2015. ISBN 978-88-541-8199-1