Chest artícol a l'è scricc in Lumbàrt, ortograféa orientàl unificàda.


Berardo Maggi, (Brèsa 'ntra 'l 1240 e 'l 1245 - Brèsa 1308) l'è stat vèscof de la céza catòlica e signùr de la cità de Brèsa. L'ìa fiöl de Emanuele Maggi, podestà de Genova 'ndel 1242, de Piacènsa e senatùr a Roma, 'ndoche l'è stat copàt endel córs de 'na soleasiù del pòpol endel 1257.

El sarcòfago 'ndoche gh'è conservàt i rèscc de Berardo Maggi

L'è stat 'na figüra de prim pià endela stória de la cità de Brèsa. L'è stat fat vèscof endel setèmber de 1275. Ai 25 de mars del 1298, el rìa a pacificà le fasiù guèlfe e ghibilìne che rindìa difìcil la vìta del Cümü e 'l se fà elèger come Signùr de la cità e, dàto che l'ìa zà vèscof, el g'ha ünificàt el potére civìl con chèl religiùs.

Dòpo la sò mórt, el sò còrp l'è conservàt dét al Dòm Vècc, enden sarcòfago de màrmo rós de Verùna, cuarciàt zó de 'n coèrcc con decorasiù de gran valùr artìstich, colocàt pròpe a l'entràda del Dòm.