CD Video
|
Quest articol chì l'è scrivud in lombard, con la Noeuva Ortografia Lombarda |
El CD Video a l'è stad un formad de disch otegh sortid in del 1987 che 'l meteva insema i tecnologie del Compact Disc con quelle del Laserdisc. 'Sti disch chi inn de dodes ghei, tant 'me un CD standard, e gh'hann dent fina a vint menut de audio in qualità CD, che 'l po vesser sonad in d'ogni letor CD e circa cinch menut de video Laserdisc analogegh con audio digital, che se po lensger in d'un letor aposta che 'l suporta l'audio digital.
El marchi a l'è stad doperad anca per di disch pussee tradizzionai de 20 e 30 cm, senza compatibilità coi letor CD, e con l'audio digital, volud de la Philips per relancià el formad Laserdisc in Europa, che 'l gh'ha havud propi poch de sucess. L'è stad comunque vist squasi subit 'me un formad fallid, anca se in Giapon l'ha menad al Video Single Disc, o ben un Laserdisc gross 'me un CD, domà de video. La Philips la s'è poeu concentrada in sui formad digitai e in del 1993 l'ha tirad foeura el Video CD, un formad noeuv e incompatibel fondad in su l'MPEG-1.
Riferiment Modifega
Alter proget Modifega
Wikimedia Commons el gh'ha dent imagin o alter archivi su CD Video
