Cavallaria

Quest articol chì l'è scrivud in lombard, con la Noeuva Ortografia Lombarda

La cavallaria l’è un codes de conduta informal de varia natura che el s’è desvilupad in Europa intra el 1170 e 1220. L’è sozziad con la figura di cavaller e di member dei olter orden cavallaresch, indova el sò comportament de lor e di galantomen in sgeneral el gh’haveva de stàgh sota ai norme sozziai del codes cavallaresch midem. I ideai de la cavallaria inn stait popolarizad in la litaradura de l’Età de Mez, soratut in di zicli litarari cognossud coma la Materia de Franza – ligada ai camarada lesgendari del Carel Magn, i paladit – e la Materia de Bretagna, che l’ha fait vegnì famos la storia del Rè Artur e di sò cavaller de la tavola regonda.

Una fomna la ghe lassa un omasg a un cavaller per inguràgh bona fortuna in bataja

Ancaben che el codes cavallaresch el se sibia desvilupad in l’Europa de l’Età de Mez, el se inradisa in la storia di segoi inanz. A par che el sibia vegnud su coma un’idealizazzion de la figura del soldad a cavall adree a l’Imperi Carolinsg, che la toveva denter corasg, eserzizzi individual e servizzi invers quii che gh’ha besœugn; soratut in Franza in mez ai soldad a cavall de l’armada del Carel el Grand.

Con l’indà del temp, el segnifegad de cavallaria in Europa el s’è refinad su con l’enfatizà pussee i virtù sozziai e morai. El codes cavallaresch – inscì coma l’era in sul fenì de l’Età de Mez – l’era un sistema moral che el messedava l’ethos del guerrer, la pietas del rè e i bei manere de cort, che, insema, faven su una nozzion de onor e nobiltà prezziada fiss in la sozzietà del temp.

Ligam de denter

• Bushidō
• Cavaller
• Virtù

Ligam de fœura

• (EN) Crouch, David (2005). The Birth of Nobility: Constructing Aristocracy in England and France 900–1300. Harlow, UK: Pearson. ISBN 978-0-582-36981-8. 
• (EN) The Art of Chivalry: European arms and armor from the Metropolitan Museum of Art.

Altri progetti

• Wikimedia Commons

• Wikimedia Commons el gh'ha dent imagin o alter archivi su Cavallaria