Concorrenza fiscal
La concorrenza fiscal a l'è la concorrenza in tra i Stat o, men de frequent, i ent locai, in sul nivell e in sul tipo de tassazion per fà in manera che i aziend e i personn scernissen de dervì o de fà San Michee lilinscì.
Al dì d'incoeu l'è fada soratutt in di mercaa unegh che pòden avè di legg different de zona a zona, compagn del Spazzi Economich Europee o di Stat Unii, ma anca in tra i Canton de la Svizzera e i comun del Liechtenstein. I economista sostegnen che la concorrenza in sul nivell di tass la pò vess bonna menter i incentiv specifich a l'investiment dann pussee problema che guadagn, de solet.
I sostenitor disen che la concorrenza fiscal la premia i Pajes cont i cunt publegh a post anca se gh'hann di tass alt, basta che ghe sien di servizzi boni in cambi, compagn di Pajes scandinav cognossuu per el sò modell nordegh, cont di tass alt ma anca cont on welfare assee desviluppaa, menter i contrari disen che la mena a 'na "corsa al ribass" che la sbassa i danee per i servizzi sociai.