Contrada de l'Ors (Milan)
|
Quest articol chì l'è scrivud in lombard, con la Noeuva Ortografia Lombarda |
La Contrada de l'Ors l'è stada una contrada de Milan del sester de Porta Comasina.
Confin
Modifega
El confin de la contrada de l'Ors l'era longh via del Lauri (indove che la confinava con la contrada del Cordus) in tra el carobi con via Boit e l'incroseggiadura in tra via Brera e piazza del Carmin. El confin el segutava poeu longh piazza del Carmin, via Pont Veter, piazza Principessa Maria, via Brovet fina del carobi con via del Lauri.
Sit de cult
ModifegaL'unich edifizzi de cult important de la contrada l'era la gesa de San Giovann ai Quater Facc che la vegniva su di rest, come che el fa capì el so nom, d'un tempi roman pagan dedicad al Gian Quadrifront.
Storia
Modifega
La contrada la toeu el nom de via de l'Ors, ciamada inscì, segond un quai autor, per onorà i De l'Ors (anticament "De Urso"), familia patrizzia milanesa che l'è stada protagonista de la storia medieval de la cità. El toch de via de l'Ors in tra via Brera e via Civass l'era popolarment ciamada "via Olmet", inscambi la part in tra via Civass e Pont Veter l'era cognossuda 'me "via a l'Ors"
I autor che sostegnen l'intitolazzion de via de l'Ors per l'omonima familia individuen el motiv de quell tribut chì in de la batalia de Campomal, capitada in del ann 1036 in de l'epoca comunal in tra l'arcivescov Aribert d'Intimian, sostegnud di feudatari magior (i capitanei), e i vassai minor (valvassor) de Milan, di quai eren part i De l'Ors. La batalia la s'è sarrada con el mazzament de un potent allead de Aribert, el vescov de Asti Alrich. I valvassor, che i eren trad insema in de la "Mota", lega militara nassuda in del 1035, eren sostegnud anca del popol. 'Me tribut a quella vitoria chì la cità de Milan l'havariss dedicad ai De l'Ors una contrada, la "via de l'Ors la Mota", toponim che el sariss stad cambiad in de l'usagg comun in "a l'Ors l'Olmet".
Inscambi segond olter autor, el nom el sariss minga ligad a l'omonima familia e ai so geste militare: per quella teoria chì, la strada la sariss stada ciamada inscì inanz de la rivada de la familia in de la storia de Milan. Segond olter ipotesi, el nom de via Olmet el vegnaria de la presenza secolara, in del mez de la via, de un storich alber de olm.
Duu toponim che gh'era in de la contrada i gh'heven origin romane: Pont Veter (o ben "vegg", con referiment ai so origin antiche, precisament romane) e la streccia Civass, che la vegnariss del latin volgar clivacium, perchè la strada, inanz, la vegniva sgiò in fina ai bastion roman de Milan. Un'oltra ipotesi la sostegn che "Civass" el vegnaria del nom de una familia nobiliara milanesa, i Civass.
Leteradura
ModifegaLa contrada de l'Ors l'è tirada a man anca in del romanz El venter de Milan del Camillo Cima, in del qual i event principai ligad a la protagonista, la Moccia, capiten propi in questa contrada chì.
Bibliografia
Modifega- (IT) Alessandro Colombo, I trentasei stendardi di Milano comunale , Milan, Famiglia Meneghina, 1935.
- Camillo Cima, El venter de Milan, 1897.