Darwin (Australia)
|
Quest articol chì l'è scrivud in lombard, con la Noeuva Ortografia Lombarda |
Darwin a l'è una cità de l'Australia, capitala del Territori del Nord, cont una popolazzion de circa 147.255 persone in del 2019, la cità a l'è el center pussee important del territori e chì la viv pupart de la popolazzion.[1] A l'è la capitala australiana pussee piscinina e pussee a nord de tute. La cità la ciapa el so nom del scenziad ingles Charles Darwin.
Storia
ModifegaInn i grup aborigen de lengua laragiya i prim abitant de la zona de Darwin.[2] El so nom de lor de l'area a l'è Garramilla,[3] o ben "preja bianca", per via del color de la preja in de la zona.[4] Haveven comerci cont el sud-est Asia e importaven ben de l'ovest e del sud Australia.
A inn stad poeu i olandes a esplorà per prim la costa nord in del secol XVII e a dissegnà la prima mapa europea de l'area. El 9 de setember del 1839, la nav inglesa HMS Beagle la riva indova incoeu el gh'è el port de Darwin. A l'è el John Clements Wickham che el el ciama "Port Darwin" in onor del Charles Darwin, che l'era stad con lor in su la nav in del viagg prima de quell chì. La cità la vegn fondada del capitan Goyder cont el nom de Palmerston, in onor de l'Henry Temple, el 5 de febrar del 1869, renominada Darwin in del 1911.[5] La cità a l'è stada recostrida squas del tut per quater voeulte, a causa del ciclon del 1897, del ciclon del 1937, del bombardament giapones in de la Segonda Guerra Mondial e del Ciclon Tracy in del 1974.[6]
Geografia
ModifegaDarwin la gh'ha a nord el mar de Timor. La cità la gh'ha denanz la zoca che la ciapa el nom de la cità, a est la Frances Bay e la Cullen Bay a ovest. El territori de la cità a l'è pian e poch volt, inscambi i coste a inn caraterizade de parch e spiage longhe. Darwin a l'è pussee vesina ai capital de olter cinch Paes in relazzion a la capitala australiana, Canberra: 3.137 km la separen de fad de quella chì, inscambi la se troeuva a 656 km de Dili (Timor Est), a 1.818 km de Port Moresby (Papua Noeuva Guinea), a 2.700 km de Giacarta (Indonesia), a 2.607 km de Bandar Seri Begawan (Brunei) e a 2.247 km de Ngerulmud (Palau).
La region, 'me bona part del Territori del Nord, la gh'ha un clima tropical cont una stagion succia e vuna umida. Un period cognossud 'me "the build up" el mena in de la stagion umida temperadure e umidità pussee volte. La stagion umida la riva de solet de fin november a december, la stagion succia, inscambi, la riva a magg e l'è manch umida.
Note
Modifega- ↑ Regional population, 2018-19 financial year. Australian Bureau of Statistics (25 March 2020).
- ↑ Our People and History. Larrakia Nation Aboriginal Corporation.
- ↑ Larrakia Development Corporation (July 2017).
- ↑ Place Names Register.
- ↑ Darwin – Northern Territory – Australia – Travel – smh.com.au. The Sydney Morning Herald (8 February 2004).
- ↑ A brief history of Darwin. Darwin City Council.
Alter proget
Modifega
Wikimedia Commons el gh'ha dent imagin o alter archivi su Darwin (Australia)
Wikivoyage el gh'ha dent Informazzion turisteghe su Darwin (Australia)
