Dentistega
|
Quest articol chì l'è scrivud in lombard, con la Noeuva Ortografia Lombarda |
La dentistega, pussee formalment odontoiatria, a l'è la disciplina medega che la studia i dincc e la prevenzion e la cura di so malann, oltra che a la possibilità de sostituì i dincc malad con di protesi, insema a l'odontotecnega. Assee vesina a la dentistega a l'è la stomatologia, che la studia i malatie de la boca e del cav oral, e despess i formad in dentistega inn formad anca in stomatologia, anca perchè la stomatologia, 'me branca de la medesina, l'è squasi descomparida, e despess collaboren anca cont i cerusegh espert de cerusia maxillo-facial.
El dotor che 'l se ocupa de dentistega el se ciama dentista, pussee formalment odontoiatra e pussee popolarment cavadincc. A segonda de l'ordenament el po vesser un medegh cont una specializazzion in odontoiatria o vun cont una laurea aposta. Sgiamò i società antighe gh'haveven di dentista, e in Europa, fina al '700 circa, a fà de dentista eren i barber-cerusegh. Vist che eren boni domà de cavà i dincc, de chi el vegn el soranom cavadincc. Incoeu, però, inn di professionista che vann adree a la scenza e ai evidenze.
Riferiment
ModifegaAlter proget
Modifega
Wikimedia Commons el gh'ha dent imagin o alter archivi su Dentistega
