Enosis
Cont el termin énōsis (ένωσις), che in grech el voeur dì union s'intend de nòrma l'idea politica de on'union tra la Grecia e Cipro (che la gh'ha ona popolazion che per la maggior part l'è de origin greca), idea che l'è scominciada a madurà duranta l'occupazion britannica de l'isola (1878-1960).
In del 1864 i Ingles aveven ceduu al noeuv Regn de Grecia i Isol Iònii, che aveven governaa per cinquant'ann. Quell fatt chì l'è staa consideraa di nazionalista grech e cipriòta come on precedent valid per la cession de territòri ellenich a la Grecia dòpo on period de amministrazion britannica. El moviment per l'énōsis l'è cressuu duranta i ann '40 e '50 del XX secol.
In del 1954, per istigazion de l'arcivescov de Cipro, el Macari III, la Grecia l'ha sostegnuu ai Nazion Unii la causa del diritt de autodeterminazion per i cipriòta, cont el prevedè che i sò abitant avarien scernii de taccàss a lee. L'ann dòpo a Cipro l'è nassuu el moviment de guerriglia de l'EOKA. A bon cunt, i trattativ tra Regn Unii, Turchia e Grecia hann daa a Cipro domà on'indipendenza puttòst debol.
El president del stat noeuv, el Macari III, che fina a qual moment l'era staa on sostenidor de l'énōsis, l'ha ciappaa in di confront de l'union con la Grecia ona posizion semper manch convinta, fina a rivà a dì, in del 1968, che l'énōsis l'era impossibil, al contrari de l'indipendenza.
'Sta ròbba chì l'ha portaa a di contrast cont i estremista, che hann formaa el moviment EOKA-B e che hann participaa al golpe sostegnuu de la Grecia e la CIA contra l'arcivescov.
El colp de stat l'è staa de durada brev, ma l'ha daa origin a l'invasion turca del tòcch settentrional de Cipro.