Enrigh II de Francia
L' Enrigh II de Valois-Angoulême (frances: Henri II; Saint-Germain-en-Laye, 31 de marz del 1519 - Paris, 10 de luj del 1559) l'è staa re de Francia del 1547 al 1559.
Fioeu del re Francesch I e de la Claudia de Valois-Orléans, l'ha segutaa la guerra contra i spagnoeu scominciada del pader. L'ha combattuu in Italia e in Francia, e l'è staa bon de streppà via la città de Calais ai ingles. Dopo 'na quai vittoria, l'ha perduu in de la battaja de San Quintin, che l'è restada proverbial.
In del 1557 l'ha firmaa la pas cont i spagnoeu cont el Trattaa de Cateau-Cambrésis, che l'ha stabilii el noeuv orden europee per on quai desenni. In de la politega religiosa, l'ha scominciaa la persecuzion contra i ugonott (i calvinista frances).
A l'è mort intant che 'l giostrava in d'on tornee a cavall. Del sò matrimoni con la fiorentina Caterina de' Medici hinn nassuu alter trii re frances: Francesch II, Carlo IX e Enrigh III.
