Filipp Maria Sforza
El Filipp Maria Sforza (Pavia, 22 dicember 1449 – 1 ottober 1492) a l'è staa on nòbel milanes, cont de Corsega e Pavia, segond fioeu del Franzesch Sforza e de la Bianca Maria Viscont, ciamaa inscì in onor del nono.
Biografia
ModifegaPromittuu a cinch agn a la Maria de Savòja, per di reson descognossuu el fidanzament el se s'ceppa.
A la mort del pader del 1466 el Ducaa el passa al fredell Galeazz, ch'esilia i fredej in Franza, degià ch'eren contrari a la soa politega filofiorentina, suggerida del secretari Cicch Simonetta.
A la mort del fredell, passaa el Ducaa al Gian Galeazz, el partecipa a 'n consili secrett con la cognada per decid el futur del Pajes.
A differenza di alter fredej a l'éra mìnga interessaa inscì tant al poder, tant che 'l s'è mìnga rivoltaa in armi e l'è staa no esiliaa. I sò fredej han provaa, per avè 'na red de doperà in l'esili, a fàll maridà ma hinn staa minga bon, anca se gh'è di font che parlen de 'n matrimoni con la Costanza, fioeula del Bosio I Sforza, e l'avaria avuu 'na fioeula, Bona, che la se marida cont el Viscont d'Aragona.