Fontana de Antescolis
|
Quest articol chì l'è scrivud in lombard, con la Noeuva Ortografia Lombarda |
La fontana de Antescolis la se troeuva arent a la porta posteriora de la basilica de santa Maria Magiora de Bergom, ciamada de la Fontana, in via Arena.[1]
Storia
ModifegaLa fontana l’era vun di lavatoi antigh che l'è probabilment del XII secol[2] e la ghe dava el nom a la vicinia citadina. La fontana e la vicinia a eren manzonade di nodar come di sit per la rogazzion de tanti at notaril a trovàss apress al tribunal[3].
I vicinie a inn nassude per di reson purament religiose e con l’andà del temp inn deventade la division in rion de la cità e n'hann agevolàd l'aministrazzion desgià che i vicini gh’haveven de sotostàgh ai regolament del comun. Toveven el nom di varie gese che eren anca el post indove se riuniven i vicini per elensger i sò aministrador. L’unica che a Bergom la gh’haveva nò questa caratteristica chì, l’è quella de Antescolis, anca se l'era intra quei pussee importante grazzie a la sua posizzion al carrobi intra i diverse vie che conlighen Bergom de sora con Bergom de sota. Probabilment l’ha tolt el nom d’ona scola, forsi quella vescovil, desgià che ‘l palazz de la curia el se trovava in sul retro de la struttura[4].
I fontane de la cità i eren cintade d’ona cancellada e in di prim ann del '300 gh’haveven di regolament precis. L’era inibid l'uso de segge che fudessen minga de ram, gh’haveven de restà sarrade de not, e apress l’era proibid fà di atività che podessen inquinànn l'aqua. A considerà che sovenz i cità eren infetade de la peste e de alter forme virai mortai, i sorgent andaven protesgiude per limità i contasg. Anca i vicini de la fontana de Antescolis gh’haveven de osservà ‘sti regolament chì[5].
In del 1331 i fontane a inn stade fornide de curlit e segge de ram a spese del comun bochetae cum cathenacium seu cartaria[6].
La fontana de Antescolis la toveva l'aqua del compless de l'Acquedot Magistral che per mez de partidor di aque la riforniva tute i vicinie, in particolar el Partidor del Vescovad l’era quell che ‘l riforniva tut i palazz de la curia, via Arena, el fontanon visconteo e anca questa fontana chì a passà sota la basilica mariana e poeu a rivà a la fontana de san Giacom[7][8].
La vicinanza de la fontana a la basilica in la soa parte pussee a est indove in del 1340 l’è stad metud el batisteri fad del Sgiovann de Campion, la fà pensà che questa chì l’è stada la prima font battesimal de la cità[9].
Descrizzion
ModifegaLa fontana de Antescolis l’è l’unica a vesser a arch dopi, la compar quasi de bot in del sortì de la porta ciamada de la Fontana fada del Pietro Isabello vers el Templi de Santa Cros[10].
Fina al 1938 la fontana l’era dent in d’on fabricad decadent indove stava el sagrista.[11] La zona l’è stada risanada a opera del vescov Adriano Bernareggi su proget del Luigi Angelini che ‘l gh’ha dad de noeuv al sit l’aspet medioeval original. La forma a dò fornas unide d’on arch trasversal la fa deventà unica del pont de vista architetonich per la cità orobica e compagna di font toscane e umber. In alt vers la basilica, l’è ancamò visibel la lapida de molera con su l’imagin de l’aquila imperial. L’inscrizzion riportava anca ‘l nom de l'autorità che l’haveva fad l'opera ma incoeu la se pò pu lensgela. La part de sora la gh’ha ona grossa fassa con di mesole anca lore consumade del temp.
Apress a gh’è la cà del Forna, perchè l’era el sit dedicad a la congregazzion de la Misericordia Magiora per la distribuzzion del pan ai bisognos, a gh’è ‘l sarcofago del qual a gh’è minga de notizzie a proposit de la sepoltura a la qual l’era dedicad.[12]
Note
Modifega- ↑ Marcella Cattaneo, Tosca Rossi, Bergamo scolpita, Frafica & Arte, 2017.
- ↑ Fontana di Astescolis. URL consultad in data 12 luglio 2018.
- ↑ GianMario Petrò, Dalla piazza di S. Vincenzo alla Piazza Nuova, Sestente edizioni, 2008.
- ↑ Il rapproto tra chiese e vicinie di Bergamo. Bergamo sera. URL consultad in data 12 luglio 2018. (arqiviad de l'url orijenal in data 12 luglio 2018)
- ↑ Andreina Franco Loiri. Bergamo scomparsa : le fontane viciniali. URL consultad in data 12 luglio 2018.
- ↑ Alla ricerca delle fontane delle vicinie. Bergamo sera. URL consultad in data 12 luglio 2018. (arqiviad de l'url orijenal in data 12 luglio 2018)
- ↑ Acquedotto Magistrale. GSB le Nottole. URL consultad in data 12 luglio 2018.
- ↑ Andreina Franco Loiri. Le tracce delle mura medioevali. Bergamo sera. URL consultad in data 13 luglio 2018. (arqiviad de l'url orijenal in data 13 luglio 2018)
- ↑ Battistero della basilica di santa Maria Maggiore. Lombardia Beni Culturali. URL consultad in data 14 luglio 2018.
- ↑ Tour delle fontane. Bergamo post. URL consultad in data 12 luglio 2018.
- ↑ Luigi Angelini, Trento Longaretti, Antiche fontane e portali di Bergamo, Bergamo, Stamperia Conti, 1964.
- ↑ Tosca Rossi, Bergamo scolpita, Frafica & Arte, 2017.
Bibliografia
Modifega- Luigi Angelini, Trento Longaretti, La fontana duecentesca di Santa Maria Maggiore (Antescolis), Bergamo, 1964.
- Luigi Angelini disegni Trento Longaretti, Antiche fontane e portali di Bergamo, Bergamo, Stamperia Conti, 1964.
- GianMario Petrò, Dalla piazza di S.Vincenzo alla Piazza Nuova, Sestente edizioni, 2008.
- Marcella Cattaneo, Tosca Rossi, Bergamo scolpita, Frafica & Arte, 2017.
Vos correlade
ModifegaLigam de foeura
Modifega- Fontana vocina alla posta posteriode di Santa Maria Maggiore. IBCAA Inventario dei Beni Culturali, Ambientali e Archeologici del Comune di Bergamo. URL consultad in data 14 luglio 2018. (arqiviad de l'url orijenal in data 14 luglio 2018)