Franzesch Ironem Cori

Quest articol chì l'è scrivuu in lombard, grafia milanesa.

El Franzesch Ironem Cori (it.: Francesco Girolamo Corio; Milan, 21 de settember del 1713 - Biaa, 17 de marz del 1796) a l'è staa on nodar e poetta milanes.

Biografia

Terz de quatter fioeu del sur Isepp Antoni Cori (de fameja biegrassina), l'ha faa l'istessa profession del pader, cioè el nodar, e l'ha ciappaa anca el titol de causidegh.
L'ha eserzitaa a Milan e a Biaa, fina al 1789. In quell ann l'è andaa in pension e l'è tornaa a viv a Biaa, indè che l'è mort sett agn adree.

Oeuver

Girolamo Corio

Arent a l'ativitaa de nodar, el Cori l'è staa anca on autor de poesii in milanes: nissuna de quest a l'è stada publicada quand che l'era viv, ma hinn staa ritegnuu degn d'atenzion de tanti studios. In de la soa produzzion (fada soratutt de poemett e sonett) la sbilza foeura per importanza la Istoriella d'on fraa cercott, che forsi l'ha ispiraa el Fraa Zenever del Carlo Porta.
El par che la pupart di sò componiment el vaga dataa in tra el 1780 e 'l 1789, cont ona quai ecezzion: per esempi, el poemett Meneghin in campagna el par che 'l sia staa scrivuu intorna al 1751, e mandaa come bosinæda a di amis.

“	A dì pocch el sarà pu de trii agn che m'è scappaa la vœuja de fà vers, e i aveva già traa dedree ai calcagn perchè hoo già faa el mè cunt che l'è temp pers; ma sta vœulta me trœuvi in d'on impegn: vuj andann fœura e fà vedè el mè ingegn. L'impegn, per vegnì ai curt, l'è de lodà ona bella delizia, de campagna d'on tal sur Peregh, mè padron de cà, dove st'ottober sont staa a fà cuccagna senza dolor de coo, senza cuntee; sto lœugh el se domanda El Rogoree. ...	”
—Descrizion d'ona villeggiatura ciamada El Rogoree

Bibliografia

• Franzesch Cherubin, Collezione delle migliori opere scritte in dialetto milanese. Vol. IX, Milan, Pirotta, 1817.
• Ferdinando Fontana, Antologia milanese, Milan, 1915.
• Franzesch Ironem Cori, Poesie milanesi e toscane (a cura del Franco Brevini), Milan, All'insegna del pesce d'oro, 1988.
• Claudio Beretta, Letteratura dialettale milanese, Milan, Mursia, 2003.

Interprogèt

• Francesco Girolamo Corio

• • Ai poetta che scriven su la mort de Maria Teresa
  • Descrizion d'ona villeggiatura ciamada El Rogoree