Galata Capitel Vün

Quel articul chì l'è scrivüü in Lumbard, cun l'urtugrafia insübrica ünificada.

Galata

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vün

¹Paul, un apostul no di vèss üman né per mèzz di vèss üman ma per mèzz del Gesü Crist e Diu Pader che 'l gh'ha levaa sü di mort, ²e tücc i fradèj che hinn cun mì, a i gés de la Galazia: ³Grazia a vialter e pas de Diu, noster Pader, e 'l Signúr Gesü Crist ⁴che 'l gh'ha daa sé medemm per i noster pecaa, per liberàmm del sècul cativ che l'è scià, segund la vuluntaa del noster Diu e Pader, ⁵al qual l'è la gloria in di sècuj di sècuj. Amén.
⁶Me meraveji che inscì sveltamént bandunii de lü che 'l v'ha ciamaa in de la grazia del Crist per un alter vangel, ⁷che l'è minga un alter, se gh'hinn no quij che ve destürben e vören müdà 'l vangel del Crist, ⁸ma anca se nümm o un angiul del cél el ve predicarìa una roba divèrsa a chèll che v'èmm predicaa, el duarìa vèss maledii! ⁹Cuma èmm dii prima e a disi adèss de növ: se quajdün el ve predica una roba divèrsa de chèll che avii ricevüü, el duarìa vèss maledii!
¹⁰Già che adèss gh'èmm cunfidénza in di vèss üman o de Diu? O cerchi de piasè i vèss üman? Se ancamò a piasevi i vèss üman, a seri minga un sèrv del Crist.
¹¹Già che a ve fuu savè, fradèj, che el vangel che l'è staa predicaa de mì l'è no segund i vèss üman: ¹²perchè mì né l'huu ricevüü d'un vèss üman, né 'l sun insegnaa ma per mèzz de la revelaziún del Gesü Crist.
¹³Già che avii sentii del mè cumpurtamént alura in del Giüdaism, che huu persegütaa tant grandamént la gésa de Diu e la stravacavi, ¹⁴e sun naa innanz in del Giüdaism ultra tant de la mia etaa intra la mia gént, essend tant püssee zelant di tradiziún di mè pader.
¹⁵E quand Diu, che 'l m'ha separaa fin del scos de mia mader e 'l m'ha ciamaa per mèzz de la sua grazia, l'ha ciapaa piasè de ¹⁶revelà 'l sò fiöö in de mì, perchè a 'l predichi intra i naziún, huu dumandaa minga sübit el cunsili de carna e sangh ¹⁷né sun naa sü a Gerüsalemm a i apostuj che eren prima de mì, ma sun naa föra in d'Arabia e pö sun turnaa indree a Damasch.
¹⁸Pö, despö trii agn, sun naa sü a Gerüsalemm per visità Cefa, e huu restaa là cun lü 15 dì, ¹⁹e huu vedüü minga i alter apostuj se no Giagum el fradèll del Signúr. ²⁰E i robb che v'huu scrivüü, varda, denanz a Diu che busardi no. ²¹Pö sun naa in di regiún de la Siria e de Cilicia; ²²e seri no cugnussüü a la fàcia a i gés de la Giüdea che hinn in del Crist. ²³E eren dumà sentend che lü che alura me persegüta, adèss el predica la féd che alura l'ha stravacaa, ²⁴e hann daa gloria a Diu per via de mì.

Navigaziun

• ← Indree a Segunda Curinz Capitel Trides
• Inanz a Capitel Düü →
• A l'indes