Gesa de San Bartolamee (Milan)

Quest articol chì l'è scrivuu in lombard, grafia milanesa.

La Gesa de San Bartolamee (italian: Chiesa di San Bartolomeo) l'era ona gesa catolega del center de Milan.
La se trovava in sul canton tra quei che incoeu se ciama via Manin e via Fatebenefratelli, e arent a on pont in sul Navili.

	«Saraan fors staa ancasì de sto partii quij giò del pont de Sant Bartolamee.»
	(Franzesch Bellatt, Quatter vers in meneghin, 1795, vv. 419-420)

Storia

La gesa veggia de San Bartolamee la gh'era giamò in del secol XI, ma l'è stada slargada al temp del Federigh Boromee. Quest chì el gh'ha daa el progett a l'architett Righin. In del cors del Ses'cent l'è deventada ona gesa frequentada di sciori milanes: tant l'è vera che fina al 1804 gh'è staa soteraa dent tanti member de l'aristocrazzia de la citaa.
In del 1848 la gesa l'è staa el teater d'on episodi di Cinch Giornad: on rosc de soldaa austriegh l'ha buttaa giò la porta de la gesa per cercà on soversiv e, quand che l'hann minga trovaa, hann coppaa el prevost che 'l voreva minga dagh ona man.
La gesa l'è stada trada giò in del 1861 per podè dervì la noeuva via Prenzip Umbert, incoeu via Turati. El sò patrimoni l'è staa menaa in la noeuva gesa omonema, in la zona de la Moscova.

Bibliografia

Maria Teresa Fiorio, Le chiese di Milano, Milano, Electa, 2006, pg. 181.

Alter progett

Wikimedia Commons el gh'ha dent imagin o alter archivi su Gesa de San Bartolamee (Milan)

Vos corelaa

Gesa de San Bartolamee Noeuva (Milan)