Giüdee Capitel Dudes

Quel articul chì l'è scrivüü in Lumbard, cun l'urtugrafia insübrica ünificada.

Giüdee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Dudes

¹Dunca, già che anca nümm gh'èmm una niula tant granda de testimonn che la me circunda, despö avè metüü via ogni ingumber e 'l pecaa che 'l circunda, currarìum la cuntesta metüda denanz de nümm, ²intanta che francum el sguard sü Gesü, autúr e cumpidúr de la nostra féd, che inscambi de la letizia metüda denanz de lü, l'ha supurtaa la crus, intanta che l'ha sprezaa la vergogna, e 'l s'è setaa giò a driza del tron de Diu. ³Defàtt, cunsideree lü che l'ha supurtaa una tal upusiziún cuntra di sé di pecadúr, perchè ve stracuv no e perduv l'anema.
⁴Avii minga resistüü ancamò fin al sangh, quand lutii cuntra 'l pecaa. ⁵E avii desmentegaa l'esurtaziún che la scumbat a vialter cumè a fiöö.
Mè fiöö, spreza no la cureziún del Signúr
né devegn débul quand te see remenaa de Lü;
⁶già che 'l Signúr el ghe curegg lü che 'l vör bén,
e 'l flagela ogni fiöö che 'l ricev.
⁷E supurtii la cureziún, Diu 'l ve trata cumè fiöö. Già che qual l'è un fiöö che un pader el curegg no? ⁸E se sii sénza cureziún, de la qual tücc hinn devegnüü culegh, alura sii bastard e no fiöö. ⁹Ancasì gh'avevum pader de la nostra carna cumè curetúr e me sèmm giraa; no tant pü me sarèmm sutametüü al Pader di Spirit e vivarèmm? ¹⁰Già che, menter lur curegeven per pocch dì, segund cumè l'en par a lur, Lü sü chèll che l'è bén perchè devegnuv culegh de la sua santitaa. ¹¹Menter ogni cureziún sül mumént l'en par vèss no de letizia ma de tristéza, despö el da frütt pasefegh de la giüstizia a lur che hinn esercitaa per sò mèzz.
¹²Dunca, fee drizz i man indebulii e i genögg scanchinaa, ¹³e fee pist drizz per i voster pee, perchè 'l zopp el sia minga giraa via ma pütost el sia guarii.
¹⁴Perseguitee la pas cun tücc e la santifegaziún, sénza la qual nissün vedarà 'l Signúr, ¹⁵vardand che nissün el fall de la grazia de Diu e che nissüna radís de maréza quand la smuca sü, la destürba no e per sò mèzz tant personn hinn tacugnaa, ¹⁶che gh'è nissün furnegadúr o persona prufana cumè Esau, che l'ha vendüü 'l sò propi diritt de vèss primm generaa per vün past. ¹⁷Defàtt savii che ancabén anca despö l'ha vurüü eredità la benediziún l'era refüdaa, già che l'ha minga truaa un lögh de cambià la sua decisiún, ancabén el gh'ha cercaa cunt i lagrimm.
¹⁸Già che sii minga vegnüü essend tucaa, essend brüsaa cunt el fögh, al barbelüsc, al scür e al burinéri, ¹⁹e al son de tromba, e a la vus di paroll, che quij che hann sentii hann dumandaa che una parola la sia giuntaa a lur, ²⁰già che hann minga purtaa chèll che l'è staa dumandaa: «E se una bestia la tuca la muntagna, sarà lapidada»; ²¹e, inscì l'ha faa pagüra chèll che l'è staa faa vedüü, Musè l'ha dii, «Mì sun spavii e stremii». ²²Ma sii vegnüü a Zion, muntagna e citaa de Diu vivent, Gerüsalemm del cél, e desmila di angiul, ²³a una riüniún festiva, a la gésa di primm generaa che hinn staa scritt in di cél, a Diu, giüdes de tücc, a i spiritt di personn giüst che hinn staa faa perfètt, ²⁴ a Gesü, mediadúr d'un növ acordi, e al sangh del sbrufà, che 'l parla mèj de chèll d'Abel.
²⁵Vardee che refüdii minga lü che 'l parla: già che se quij sü la tèra che gh'hann refüdaa lü che 'l i ha visaa hann minga scapaa via, tant pü nümm che girum via del cél, ²⁶la vus del qual l'ha scurlii la tèra una völta, e adèss el fa 'l prumèss, disend:
«Ancamò una völta mì scurlaruu no dumà la tèra ma anca el cél».
²⁷E 'l «ancamò una völta» el mussa el tö via di coss scurlii, cumè di coss che hinn staa faa, perchè 'l resta quijcoss che hinn no scurlii.
²⁸Dunca, ricevend un règn no scurlii, gh'avarìum grazi, per mèzz de quij servarìum Diu cetabilamént, cun scapelada e riguard: ²⁹già che anca 'l noster Diu l'è un fögh che 'l cunsüma.

Navigaziun

• ← Indree a Capitel Vündes
• Inanz a Capitel Trides →
• A l'indes