Giüdee Capitel Quater

Quel articul chì l'è scrivüü in Lumbard, cun l'urtugrafia insübrica ünificada.

Giüdee

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quater

¹Dunca, intanta che la resta la prumèssa del nà denter al sò requià, gh'avarìum pagüra perchè 'l para no che quajdün de vialter el ghe manca. ²Già che anca nümm èmm staa vangelizaa propi cumè lur; ma la parola che hann sentii la fava no bén a lur, perchè eren minga messedaa insèma cun la féd in quij che hann sentii. ³Già che nümm che credum andèmm denter al sò requià, cumè l'ha dii:
«Cumè huu giüraa in de la mia ràbia:
Andarànn no denter al mè requià»,
ancabén i sò oper hinn staa finii del prenzipi del mund. ⁴Già che l'ha dii de qual part sül sètim inscì: «Anca Diu l'ha requiaa in del sètim dì di tücc i sò oper», ⁵e in de chèst de növ: «Andarànn no denter al mè requià». ⁶Dunca, già che 'l resta che quij ghe narànn denter e i primm, ancabén eren vengelizaa , hinn naa no denter per via de la sua infedeltaa, ⁷de növ el numina un dì «Incöö», disend travèrs David despö tant témp, propi cumè l'è staa vist prima:
«Incöö, se sentii la sua vus,
Fee no dür el voster cör».
⁸Giò che se Gesü l'ha daa 'l requià, l'ha dii no despö chèstcoss sü quajdün alter dì. ⁹Dunca, la resta un requià de sabet per el pòpul de Diu. ¹⁰Già che lü che 'l va denter al sò requià, anca lü l'ha requiaa di sò oper, propi cumè Diu l'ha faa di sò. ¹¹Dunca, farìum prèssa de nà denter a chèll requià, perchè 'l burla no giò quajdün per el medemm esèmpi de desübediénza.
¹²Già che la parola de Diu l'è vivent, ativ e püssee filaa de ogni spada a dübi taj, e va denter fin a la divisiún de l'anema e 'l spirit, e di giunt e midol, e capaz de giüdegà i pensee e sentimént del cör; ¹³e gh'è no una creatüra scundüda denanz de Lü, ma tüsscoss hinn biott e desquataa a i sò öcc, a chi per nümm l'è la parola.
¹⁴Dunca, già che gh'èmm un sacerdott scèff grand che l'è naa travèrs i cél, Gesü el fiöö de Diu, tegnarìum sald a la prufessiún. ¹⁵Già che gh'èmm no un sacerdott scèff che 'l po minga simpatizà cunt i noster debulézz, ma perchè l'è staa tentaa in d'ogni cossa in de l'istessa manéra, sénza pecaa.
¹⁶Dunca, andarìum denanz cun cunfidénza al tron de la grazia, perchè nümm ricevum misericordia e trövum grazia a ajütt upurtün.

Navigaziun

• ← Indree a Capitel Trii
• Inanz a Capitel Cinch →
• A l'indes