Gianda (anatomia)
|
Quest articol chì l'è scrivud in lombard, con la Noeuva Ortografia Lombarda |
I giande a inn orghen secretor che serven a la liberazzion de sostanze utel a l'organism. L'unità fonzionala, o parenchima, de la gianda a l'è representada de un epiteli giandolar in sociazzion a una porzion conetivala (stroma) de sostegn e trofega, per podé ospità e render possibel el transit de una red de sangh de nudrizzion e di terminazzion nervose.
In bas al fin del secred i giande se spartissen in du tip:
- giande endocrine, che lassen i secred in di liquid de denter del corp;
- giande esocrine, che lassen el secred de foeura del corp o in cavità conligade cont el de foeura.
Tute e do quei tipologie de giande chì a inn compagne per l'origen: tute e do vegnen de un epiteli de quatadura che el se prefonda in del miconetiv de sota. Per i giande esocrine, a inn in gener pluricellular (a ecezzion de la cellula mucipara calciform) e poeudom spartìi in do unità: adenomer e dot escretor. L'adenomer a l'è l'unità che la manda foeura de la gianda, o ben che la produs el secred. Quella porzion chì, o de tute i manere la gianda medema, la resta conligada a l'epiteli de che la gh'ha havud origen cont el dot, denter de quest chì el vegn lassad el secred. Quella chì la costituiss l'organizazzion de una gianda esocrina. Per la gianda endocrina, la modalità de origen a l'è la medema, foeura che per el fat che se perd el conligament con l'epiteli d'origen (se recognossen né un dot escretor né un adenomer) e che el parenchima giandolar el se organiza intorna a una granda red capillara sinusoidala a l'interna de la che lassen el so secred, o ben l'ormon.
Gianda esocrina Modifega
I giande a poeuden vesser classifegade in bas a vari parameter:
in bas al numer de cellule che ja componen in:
- unicellular inn costituide de un'unega cellula, o ben la gianda la se identifega con quella. In de l'om quell tip de gianda chì a l'è representad domà di cellule mucipare formade de una porzion streccia e una part indova el se ferma el secred. A gh'inn in de la mucosa intestinala e in quella respiratoria
- pluricellular: l'adenomer a l'è costituid de pussee cellule.
I pluricellular a se poeuden classifegà in bas a la modalità con la che el vegn liberad el secred in di giande:
- apocrine: el secred el se acumula in de la porzion apicala de la cellula sota forma de granui minga quatad de membrana. Al moment de la secrezzion, la membrana plasmatega la va denter e la se fond a costituì un'unega granda vessigola de secrezzion, la cellula la perd una part de citoplasma e de membrana plasmatega.
- merocrine o ecrine: a inn i pussee comun. El secred el se forma 'me di granui quatad de membrana e el vegn mandad foeura cont i comun process de esocitos.
- olocrine: (del grech holos, tut), l'intrega cellula la partecipa a la secrezzion: el secred el se forma in de la cellula che la va via via in degenerazzion in fina a costituì lee medema el secred. In de la secrezzion olocrina (che la vegn per esempi in di giande sebacee) la cellula la se perd, donca a gh'hann de vessegh di element de reserva, i cellule staminai, che con la duplicazzion e diferenziazzion, mantegnen istess l'asset cellular.
In fonzion de la natura chimega del secred a se recognossen giande:
- sierose: el secred a l'è una sostanza sierosa fluida e a carater in prevalenza enzimategh. I cellule sierose a inn caraterizade de desvilupad reticol endoplasmategh granular (responsabel de la basofilia citoplasmatega) e compless de Golgi. El secred a el se troeuva in de la porzion apicala de la cellula coma granui de zimogen. La cellula sierosa la presenta la forma de una piramid tronca; el nucleo, in gener redond, en ocupa la part basala.
- mucose: el secred l'è dens e viscos perchè el contegn mucina che a contat con l'aqua la vegn muco. Quell secred chì a l l'è costituid de mucopolisacarid che cont i comun tecneghe de allestiment istologeghe el vegn fad diventà franch e colorad (i mucopolisacarid i gh'hann una pussee granda component sacaridega, inn PAS positiv). En vegn dedree che i cellule mucose paren s'ciumose e bianche. Cont un microscopi eletronegh a se poeuden vardà nuclei cellular piscinin e scur, schisciad in de la part basala de la cellula.
- miste: inn giande che presenten sia cellule sierose che cellule mucose disposte in manera carateristega. De fad, i cellule sierose, a diferenza di mucose, a varden minga a la cavità de l'adenomer ma la quaten, e formen quei che vegnen ciamade coma semi-lune del Giannuzzi o sierose per via de la so carateristega forma semi-lunara.
I semi-lune sierose lassen el so secred denter di capillar de secrezzion, che a inn minga di vas ma di microcavità (speci de canalicol) in tra i doce di cellule mucose arente.
I giande a poeuden anca vesser classifegade in
- intraparietai: resten in del spessor de la pared del che epiteli de quatadura gh'hann havud origen (per esempi i giande di cripte de Lieberkuhn in de l'intestin). A segonda de la posizzion respet a l'epiteli de origen, quei chì a se poeuden classifegà in intraepiteliai (se resten in del spessor de l'epiteli) o extraepiteliai (se a se troeuven in del conetiv de sota).
- extraparietai: a se troeuven de foeura de la pared del che epiteli gh'hann havud origen ma ghe resten conligade per mezz del so dot escretor (per esempi fidegh e pancreas).
La forma de l'adenomer la costituiss un olter parameter de classifegazzion di giande in acinose, tubular, alveolar. A segonda del raport adenomer/dot escretor a gh'inn giande:
- ladine: un adenomer cont el so dot escretor o pussee adenomer che se derven in sul medem dot escretor (in quell cas chì a se parla de giande ramifegade).
- componide: gh'inn tant adenomer ciaschedun cont el so dot escretor che 'l sboca in dot de caliber via via pussee grand (in olter termen a l'è el dot escretor che 'l se ramifega).
Ghe poeuden vesser di giande de grand dimension che presenten una so tipega organizazzion. In quell cas chì la gianda a l'è quatada de un conetiv dens ciamad capsula. De quella chì a se departen di set conetivai (ciamad interlobar) che i spartissen la gianda.
Gianda endocrina Modifega
L'epiteli giandolar endocrin el produs ormon che vegnen reversad in de l'interstizzi conetival e de chì in del circol del sangh o linfategh. L'ormon a l'è una sostanza che la poeul influenzà el metabolism de la cellula (cellula bersai) per la che el gh'ha i recetor. En deriva che i ormon a inn sostanze seletive fiss: per esempi, l'ormon TSH o tireotrop produt de l'ipofis el gh'ha i so cellule bersai domà in tra quei de la tiroid, perchè domà quei i gh'hann i recetor per quell ormon lì. De quest ultem a l'è de sorapu necessari tegnì in considerazzion la natura chimega, perchè la determina la modalità de azzion de l'ormon medem. Gh'inn do tipologie de ormon: steroidee e peptidegh o polipeptidegh. I prim (per esempi i ormon gonadegh e cortico-sorenai) a inn di derivad del colesterol, lipid minga idrolizabel e anfipategh; donca a poeuden passà la membrana plasmatega de la cellula bersai e ligàss a un recetor citoplasmategh: el compless ormon-recetor citoplasmategh el determina una seri de modifegazzion metaboleghe. I ormon peptidegh e polipeptidegh a poeuden presentà di grup polar e a poeuden vesser grand; donca, i gh'hann una certa dificoltà a passà la membrana plasmatega: te chì che alora i se lighen a di recetor de membrana (proteine glicosilade) e quell ligam chì el principia una seri de reazzion a cadena che riven a la trasformazzion de l'ATP in cAMP (adenosinmonofosfad ciclegh). Quella sostanza chì la juta l'ormon, cont el passà a l'interna de la cellula el messagg, o ben a l'è un segond messager. In olter termen, quell'ultema categoria chì de ormon la lavora travers una trasduzzion del segnal.
I giande endocrine a poeuden vesser spartide in du grup:
- unicellular che costituissen el sistema endocrin spantegad.
- pluricellular che se spartissen in:
- follicolar Costituida de cavità sferoidai che la produs la colloid (un preormon). In del corp de l'om en inn esempi la tiroid e la part intermedia de l'ipofis
- cordonai Costituide de fila de cellule fianchegiade de capillar, tacade de desmosom e ligam strecc. I cordon a inn serciad de tessud conetiv reticolar. En inn esempi adenoipofis, epifis, paratiroid e sorenai.
- a isolot Costituide de "isole" endocrine in del parenchima de un orghen esocrin, per esempi i isolot Langerhans in del pancreas.
- interstiziai A gh'inn quand che cellule endocrine a se troeuven sparse in del conetiv di spazi interstizziai de un orghen. En inn un esempi i cellule interstiaziai di gonad (cellule de Leydig in del testicol, teca interna e corp luteo in de l'ovaio).
Ligam de foeura Modifega
Alter proget Modifega
Wikimedia Commons el gh'ha dent imagin o alter archivi su Gianda (anatomia)
